Тәуелсіздік – ұлттың ұлы мұраты, ұрпақ санасына ұялатар ең қастерлі құндылық. Бүгінгі таңда осы құндылықты жас өрендердің жүрегіне терең орнықтыру мақсатында еліміздің білім беру ұйымдарында ауқымды жұмыстар атқарылып келеді. Абай облысы Семей қаласындағы жалпы орта білім беретін мектептерде тәуелсіздіктің рухын дәріптейтін бастамалар жүйелі түрде жүзеге асуда. Бұл болашақ ұрпақты елжандылыққа, жауапкершілікке тәрбиелеуде маңызды қадам.
Қаладағы 53 мектептің барлығында Қазақстан Республикасының мемлекеттік рәміздеріне арналған бұрыштар талапқа сай орнатылған. Әрбір рәміздер бұрышында Мемлекеттік Ту мен Елтаңба, Гимн мәтіні, сонымен бірге тәуелсіздік рәміздерінің мәні мен маңызын түсіндіретін ақпараттық материалдар орналастырылған. Бұл бұрыштар оқушылардың мемлекеттік нышандарға деген құрметін арттырып, ел тарихына сүйіспеншілігін қалыптастыратын маңызды тәрбие алаңы.
Білім беру ұйымдарында жүзеге асырылып келе жатқан «Адал азамат» бірыңғай тәрбие бағдарламасы да жас ұрпаққа өнегелі қасиеттер дарытуды көздейді. Бағдарлама аясында әр мектепте адалдық, әділдік және отансүйгіштікті насихаттайтын арнайы үнемі жаңартылып отырады. Бұл оқушыларды азаматтық ұстанымы берік, мәдениеті жоғары тұлға етіп тәрбиелеуге бағытталған тәрбиелік ортаның ажырамас бөлігі.
Семей қаласындағы 53 мектептің 52-сінде әскери-патриоттық клубтар тұрақты жұмыс жасап келеді. Бұл клубтарда оқушылар саптық дайындық дағдыларын меңгеріп, алғашқы әскери дайындық және азаматтық қорғаныс негіздерімен танысады. Сонымен қатар тәртіпке, ұлттық рухқа тәрбиелейтін іс-шаралар тұрақты өткізіледі. Мұндай орта жасөспірімдердің бойында ел қорғауға деген жауапкершілік сезімін оятып, оларды батыл да жігерлі азамат болып қалыптасуына ықпал етеді.
Еліміздің болашағын елжанды жастармен байланыстыра отырып, Семей қаласында «Жас сарбаз» кадет сыныптарының ашылуы да тәуелсіздік рухын нығайтудың маңызды бастамасы. Бүгінде қаладағы 13 мектепте 15 кадет сыныбы жұмыс істеп, 295 оқушы арнайы бағдарлама бойынша білім алуда. Кадет сыныптарында оқушылар әскери тәртіпке баулып, патриоттық бағыттағы арнайы дайындықтан өтеді. Осылайша балалар елінің тағдырына бейжай қарамайтын, жауапкершілігі жоғары азамат болып қалыптасады.
Семей мектептеріндегі игі бастамалар тәуелсіздіктің рухын әр баланың жүрегіне жеткізіп, елдік идеологияны нығайтады. Тәуелсіз еліміздің ертеңін қорғайтын ұрпақ тәрбиелеу әр мектептің, әр ұстаздың және ата-ананың ортақ міндеті. Осындай жүйелі тәрбиелік жұмыстар арқылы елін сүйетін, рухы асқақ, саналы да парасатты жастардың қатары арта беретіні сөзсіз.
