Қазақстан Республикасы президенттігіне үміткер Н.Ә. Назарбаевты қолдау бойынша Семей қалалық сайлауалды штабы құрылды. Сайлауалды штабтың жұмысымен таныстыру мақсатында, өткен жұма күні Қазақ гуманитарлық инновациялық-заң университетінің «Қазақстан жолы» тәрбие-білім орталығында арнайы брифинг өтті.
{jcomments on}Қазақстан Республикасы президенттігіне үміткер Н.Ә.Назарбаевты қолдау бойынша Семей қалалық сайлауалды штабының төрағасы болып Семей қаласының Шәкәрім атындағы мемлекеттік университетінің ректоры Шәріпбек Әмірбеков тағайындалған.
Брифинг барысында штаб төрағасы Шәріпбек Әмірбеков пен штаб төрағасының орынбасары, «Нұр Отан» партиясының Семей қалалық филиалы төрағасының бірінші орынбасары Гүлнар Жігітбаева БАҚ өкілдеріне штаб жұмысы жайлы жан-жақты ақпарат берді.
— Алдағы 26 сәуірде өтетін Қазақстан Республикасы Президентінің сайлауына 11 наурыз күні өткен «Нұр Отан» партиясының ХVI съезінде ҚР Президенті, «Нұр Отан» партиясының Төрағасы Нұрсұлтан Әбішұлы Назарбаевтың партия атынан президенттікке үміткер ретінде ұсынылғаны белгілі. Бұл тұрғыда қоғамдық штабтың мақсаты – үміткерді қолдауға байланысты қол жинау, халықпен тығыз жұмыс істеу, Елбасының саясатын насихаттау, бейбітшіліктің, тәуелсіздіктің қадірін бағалай отырып, көп ұлтты еліміздегі ұлтаралық келісімді, тұрақтылықты, тыныштықты сақтау негізінде жұмыс жүргізу, — дейді Ш.Әмірбеков.
Штаб төрағасының айтуынша, Қазақстан Республикасы Президенттігіне үміткер Н.Ә.Назарбаевты қолдау бойынша Семей қалалық сайлауалды штабының құрамында саяси партиялардың жетекшілері мен білім, ғылым, мәдениет салаларының қызметкерлері, кәсіпкерлер мен қоғамдық кеңес мүшелері, жалпы, 25 адам жұмыс істейді екен.
Айта кету керек, Қазақстан Республикасы президенттігіне үміткер Н.Ә.Назарбаевты қолдау бойынша Семей қалалық штабы ҚазИГЗУ-дің бас ғимаратында (Ленин көшесі, 11 мекенжайы) орналасқан. Аталмыш штабтың 435 сенімді өкілі бар екенін тілге тиек еткен Шәріпбек Ағабайұлы қала тұрғындарының кез келген мәселе бойынша сұрақтарына жауап беру үшін ғимараттың екінші қабатында таңертеңгілік сағат 9.00-ден кешкі сағат 21.00-ге дейін қоғамдық қабылдау жұмыс істейтінін жеткізді.
Нұрдәулет КӘКІШЕВ,
«Семей таңы»
