Сәрсенбі күні қалалық мәслихаттың кезекті отыз сегізінші сессиясы өтті. Жиынға қала әкімінің орынбасары Асхат Хосчанов пен бөлім басшылары, құқық қорғау органдары мен мемлекеттік мекемелер басшылары қатысты.
{jcomments on}Қалалық мәслихаттың хатшысы Бейсенбек Ақжалов қалалық мәслихаттың депутаты, кәсіпкер Талғат Омаровты «Қалалық мәслихаттың 20 жылдығына арналған» медалімен және кәсіпкерлік саласындағы ерен еңбегі үшін ҚР Премьер- министрі мен кәсіпкерлік палатасының Алғыс хатымен марапаттады.
Сессияның күн тәртібінде 7 мәселе қаралды. Қалалық мәслихат сессиясының төрағасы Жұмағазы Рахымғалиевтың кіріспе сөзінен соң бірінші мәселе бойынша, яғни қалалық мәслихатқа 2014 жылы сайлаушылардан түскен өтініштерді қарау және өтініштер бойынша қабылданған шаралар жөніндегі ақпарат туралы, қалалық мәслихаттың хатшысы Бейсенбек Ақжалов баяндама жасады.
— 2012 жылы 15 қаңтарда қалалық мәслихат депутаттарының алдына сайлаушылар тарапынан 140 мәселе қойыл-ған болатын. Оның 114-і қала бойынша, ал қалған 26-сы ауылдық округ тұрғындарынан. 140 мәселенің 92-сі тұрғын үй- коммуналдық шаруашылық саласы бойынша болды. Қазіргі уақытта 44 сұрақ өз шешімін тапса, 54 сұраққа тиісті жауаптар қайтарылды. Бұл мәселелер қала әкімінің үнемі бақылауында. Қалалық мәслихаттың жұмыс жоспары бойынша қысқы жылыту маусымына ерекше көңіл бөлінеді. 2014 жылдың мамыр айында 2013-2014 жылдардағы жылыту маусымының қорытындысы туралы мәселе көтерілген болатын. Жылыту маусымына дайындық жұмыстардың жүргізілуі аясында депутаттар аталмыш мәселе бойынша нысандарды аралап, істің барысымен танысып, қалалық ТҮКШ, көлік және автомобиль жолдары бөлімі мамандарының есебін тыңдаған еді. Нәтижесін-де РК-1 қазандығындағы мәселелер анықталып, ол мәселелер мәслихаттың талқылауынан кейін тиісті органдардың құзырына берілген еді. Осындай нәтижелі жұмыстар бойынша тұрғындар тарапынан түсетін арыз-шағымдардың азайғанын айтып өткен жөн, — деген Бейсенбек Ақжалов атқарылған жұмыстарды саралап өтті.
Сондай-ақ сессия барысында ішкі саясат бөлімінің діни экстремизм және терроризмге қарсы іс-қимыл жөніндегі мемлекеттік бағдарламаны жүзеге асыру саласындағы жұмысы, сәулет және қала құрылысы бөлімінің Семей қаласының Бас жоспарын жүзеге асыру жөніндегі жұмысы, 2012 жылғы 15 наурыздағы № 3/21-V «Семей қаласында кәсіпкерлік саласындағы мемлекеттік саясатты жүзеге асыру туралы» шешімінің орындалу барысы, Семей қаласы мәслихатының 2014 жылғы 23 желтоқсандағы № 36/191- V «Семей қаласының 2015-2017 жылдарға арналған бюджеті туралы» шешіміне өзгерістер мен толықтырулар енгізу, 2014 жылғы 31 наурыздағы № 28/150- V «Әлеуметтік көмек көрсетудің, оның мөлшерлерін белгілеудің және мұқтаж азаматтардың жекелеген санаттарының тізбесін айқындаудың қағидаларын бекіту туралы» шешімге өзгерістер енгізу, Семей қаласы бойынша коммуналдық қалдықтарды жинақтау, шығару және көмуге тарифтерді бекіту туралы мәселелер қаралды. Аталмыш мәселелер бойынша халық қалаулылары бірауыздан дауыс беріп, шешім шығарды. Баяндамашыларға көтерілген мәселелерге қатысты сұрақтарын қойған депутаттар өздерінің пікірлері және ұсыныстарымен де бөлісті.
Жиын соңында қалалық мәслихат сессиясының төрағасы Жұмағазы Рахымғалиев жиналғандарды келе жат-қан Ұлыстың Ұлы күні — Наурыз мерекесімен құттықтап, отбасыларына береке-бірлік тіледі.
Нұрдәулет КӘКІШЕВ,
«Семей таңы»
