Жер аяғы кеңіп, көктемнің ұлық мерекесі – Наурыз да келіп жетті. «Ұлыс оң болсын! Ақ мол болсын!» деген баталы сөзден басталатын мейрамның игілігі мен қуанышы ерекше. Қыстан артылған тәтті-дәмділерін әзірлеп, наурыз көже пісіріп, дастарқан жаятын еліміз осы күні реніш, пендешілік атаулыдан арылады. Әсіресе ақ жаулықты аналар үшін бұл күннің ерекшелігі басым. Себебі мерекеге аналарымыз қам жасайды. Ұлыстың ұлы күнін асыға күтетін жандардың бірі — жармалық Күлбадан Үсенова анамыз.
{jcomments on}Жармалық әжей Күлбадан Үсенованың айтуынша, Ұлыстың ұлы күні — өзінің отбасы үшін үлкен мереке. Себебі алыс – жақындағы ұл – қыздарының барлығы Күлбадан апаның шаңырағына жиналады.
— Наурыз мерекесі бүкіл шығыс халықтарында мыңдаған жылдар бойы тойланып келе жатыр. Күллі дүние-ні қайта түлеткен Жаңа жылды, шуақты күндердің басы саналатын Ұлыстың ұлы күнін, еліміздегі барлық ұлт өкілдері тойлайды. Ұлыс күні Қызыр ата табалдырықтан аттайды, ренішті ұмытып, кінәні кешірісетін, жастары жасамысына сәлемін, қарттары ұрпағына батасын беретін бұл күні Қызыр атаның ақ тілегі қабыл болады. Наурыз — ең көне мейрамдардың бірі, тарихы тереңде жатқан бұл мереке іргесі сөгілмеген бірліктің, еңселі елдіктің, ырыс пен бақ — берекенің мерекесі болып саналатын халқымызда. Қыстан шыққан халқымыз бір — бірімен қауышып, бір-бірімен төстесіп, ағайынның аманшылығын біліп, өткенге салауат деп, келешектен бақыт тілеп наурыз көже ішетін болған.
Әр отбасы бұл мерекеге арнайы дайындалады. Хал- қымыз үшін бұл мереке — ұлық мереке,- деген Күлбадан әже Ұлыс оң болсын дей отырып, әрбір шаңыраққа шаттық, береке-бірлік, денсаулық, толағай табыс тіледі.
Аманжол КИКБАЕВ,
Жарма ауданы ішкі саясат бөлімінің
бас маманы.
