Міне, көптен күткен Наурыз мерекесі де келіп жетті. Халықаралық Наурыз күні деп аталып, адамзаттың мәдени мұра тізіміне енген бұл мерекені әрбір ұжым, әрбір мектеп ерекше әзірлікпен қарсы алады. Наурыз мерекесі алдағы жылғы молшылықтың жоралғысы ретінде жасалатын наурыз көжесімен ерекшеленеді. Мерекенің ең негізгі дәмі болып табылатын наурыз көже әр шаңырақта әзірленеді. Ал ұлты неміс отбасының берекелі дастарқанындағы наурыз көжеден дәм татқанның өзі бір ғанибет қой!
{jcomments on}Біз әңгіме еткелі отырған берекесі жарасқан отбасының анасы Екатерина Беннер -қазақтың ұлттық тағамы наурыз көжені дайындаудың нағыз шебері. Екатеринаны ауылдастары Катя деп атап кеткен. Ол кісіні Ақсуат халқы ерекше құрметтейді. Сонау департация кезінде Тарбағатай жеріне келген неміс ұлтының қызы Катя апай Ақсуат ауылында шаңырақ құрып, бала-шағасын өсіріп, армандаған мақсаттарына қол жеткізіп отыр. Қазақ халқының қонақжайлылығы мен тектілігін көріп өскен Катя апайдың күйеу баласы Ержан мен келіні Жанар — қазақ. Бәрі де Катя апайды сыйлап тұрады. Үлкен қызы Лариса — «Өкпеті» мейрамханасында бармағынан бал тамған аспаз, күйеу баласы Ержан Ақсуаттағы К.Нұрбаев атындағы орта мектепте жұмыс істейді. Апайдың ұлы Александр мектепте мультимедиа кабинетінде зертханашы болып жұмыс істесе, келіні Жанар «Тарбағатай жолдары» мекемесінде еңбек етіп келеді. Қазақ тілі мен дәстүрін жетік меңгерген Катя апайдың отбасында Наурыз мерекесін тойлау дәстүрге айналған. Қазақ ұлтының қонақжайлылық дәстүрі дарыған Катя апайдың дастарқанында қазақтың ұлттық тағамдары – құрт пен май, сүзбе мен ірімшік, түрлі қоспалар толып тұрады.
«Жеті түрлі тағамнан дайындалатын наурыз көже дәмділігімен қоса, денсаулыққа пайдалы, дәрумендерге де бай», — дейді Катя апай наурыз көже дайындарда. Кейінгі кезде денсаулығы сыр беріп жүрген апай келіні Жанарға наурыз көже дайындаудың қыр-сырын жақсылап үйреткен. Ұлты басқа болса да, тілегі бір Катя апай өз шаңырағына ғана емес, барша қазақ халқына береке мен бірлік тілеп отырады.
«Биылғы жыл — Қазақстан халқы Ассамблеясының 20 жылдық мерекесі жылы. Елімізде ұлттардың татулықта өмір сүріп жатқаны Елбасы Нұрсұлтан Назарбаевтың ерен еңбегі деп білемін. Барша аналар сияқты, мен де елімізге тыныштық тілеймін», — деген асыл ананың ақжарма тілегіне қосыла отырып, көпұлтты егемен еліміздің болашағы жарқын болатынына сенеміз. Себебі қазақтың қасиетті жерін мекендеген барлық ұлттың баласы бірдей тату-тәтті өмір сүріп жатқаны шындық.
Жұмаш МАХАНОВА,
«Семей таңы» газетінің штаттан тыс тілшісі,
Ақсуат ауылы, Тарбағатай ауданы.
