Semeytany.kz — Облыс әкімі Берік Уәли Үкімет отырысында Абай облысының 2025 жылғы есепті кезеңдегі әлеуметтік-экономикалық даму қорытындылары туралы баяндады.
Аймақ басшысының айтуынша, өңірдің қысқа мерзімді экономикалық индикаторы 101,1% деңгейінде қалыптасты. Ал Ұлттық даму жоспарына сәйкес, жыл соңына дейін жоспарланған көрсеткіш 103,6% көлемінде орындалады деп күтіліп отыр. Өсім көлік саласында 125,2%, байланыста 106,1%, ішкі саудада 103,7%, өңдеу өнеркәсібінде 102,8%, құрылыста 102,5%, ауыл шаруашылығында 100,9% деңгейінде қамтамасыз етілген.
Есепті кезеңде облыс экономикасына жалпы көлемі 495,2 млрд теңге инвестиция тартылып, нақты көлем индексі 104,6% болды. Оның ішінде жеке инвестиция көлемі 355 млрд теңгені құрап, нақты көлем индексі 98,1% деңгейінде тіркелген. Өңірге қаржы тарту бағытында нақты іс-шаралар жалғасып жатыр.
«Облыс экономикасының тұрақты өсімін қамтамасыз ету мақсатында жыл басынан бері инвестициялық жобалардың саны 29-дан 98-ге дейін өсіп, тартылатын инвестициялар көлемі 2,2 трлн теңгеден 3,8 трлн теңгеге ұлғайды. Оның ішінде 16,1 млрд теңгеге 10 жоба жүзеге асырылып, 228 жұмыс орны құрылды», – деді Берік Уәли.
Жыл соңына дейін 14,2 млрд теңгеге тағы 4 жобаны іске асырып, 280 жаңа жұмыс орнын ашу жоспарланып отыр. Сонымен қатар Семей қаласында жаңа шағын ауданның жобасы әзірленуде. Жаңа инфрақұрылым тұрғын үй құрылысын жандандыруға жол ашып, биыл 270,5 мың шаршы метр тұрғын үйді пайдалануға беру көзделген. Облыс бойынша өзге де негізгі көрсеткіштер жыл қорытындысында өсіммен аяқталады деп жоспарлануда.
