Semeytany.kz — Бородулиха ауданына қарасты Петропавловка ауылында спорттық-сауықтыру орталығы ашылып, тұрғындар игілігіне берілді. Елді мекен облыс орталығы – Семей қаласынан 37 шақырым жерде орналасқан, бүгінде мұнда 883 адам тұрады.
Нысан құрылысы 2024 жылы басталып, биыл толық аяқталған. Жаңа ғимараттың жалпы ауданы 864 шаршы метрді құрайды. Бір мезетте 300 адамды қабылдай алатын орталық ауыл тұрғындарының бос уақытын тиімді өткізіп, спортпен тұрақты шұғылдануына жағдай жасамақ.
Орталықта мәдени және спорттық бағыттағы үйірмелер кезең-кезеңімен ашылады деп жоспарланған. Атап айтқанда, домбыра, фортепиано, гитара секілді музыкалық сабақтар, мүсіндеу мен сурет салу, театр үйірмесі жұмысын жолға қою көзделіп отыр. Сонымен қатар, дойбы, шахмат, тоғызқұмалақ бойынша зияткерлік үйірмелер, IT бағытына қызығушыларға арналған топтар ашылмақ. Спорттық секциялар қатарында волейбол, баскетбол, футбол, фитнес және өзге де түрлер болады.
Жаңа нысанның ашылу салтанатына облыс әкімі Берік Уәли қатысып, тұрғындарды қуанышымен құттықтады. Оның айтуынша, бұл ғимарат ауыл үшін маңызды әлеуметтік нысандардың бірі.
Ауыл халқы бұл жаңалықты ерекше ықыласпен қабылдады. Себебі Петропавловкада 2000 жылдан бері мәдениет пен спортқа арналған жеке мекеме болмаған. Тұрғын Шафқат Исмурзиннің айтуынша, енді жастар мен балалардың тұрақты жаттығып, бос уақытын пайдалы өткізуіне мүмкіндік артты, ауылдан мықты спортшылар шығатынына сенім бар.
Айта кетейік, биыл Бородулиха ауданында 50-ге жуық бұқаралық спорттық іс-шара өтіп, оған 3 мыңнан астам адам қатысқан. Ауданда 65 спорт нысаны мен 33 спорт залы жұмыс істейді. Бородулиха балалар-жасөспірімдер спорт мектебінің қарамағында спорт кешені мен стадион бар. Қазіргі таңда спорттың 35 түрі бойынша 414 секция жұмыс істеп, дене шынықтырумен жүйелі айналысатын тұрғындар саны 13 014 адамға жеткен.
