Наурыз мерекесі — жарық пен қараңғы, күн мен түн теңелетін, табиғаттың жаңаруын білдіретін, халықты ынтымаққа, бірлікке жетелейтін көпшілік қауым ел болып тойлайтын мазмұны терең, мәні үлкен мейрам.
{jcomments on}Ұлыстың ұлы күні біздің өңірімізде де қалыптасқан дәстүр бойынша аталып өтіледі. Береке — бірлікті ту еткен мерекені тойлауға барлық этностардың өкілдері қатысып келеді. Наурыз мерекесін жыл сайын айрықша атап өтетін — Семей қаласындағы неміс ұлттық орталығы. Әр мерекені мәнді өткізуге тырысатын орталық төрайымының орынбасары Ольга Мюллермен сұхбаттасудың сәті түсті.
Ольга Мюллер неміс ұлттық орталығы Ұлыстың ұлы күнін тойлауға құрылған кезінен бастап атсалысып келе жатқанын айтады. Мәселен, бірлестік жыл сайын Наурыз мерекесін атап өту аясындағы түрлі мекемелердің шараларын өткізуге үлес қосатын көрінеді. Биыл да сол игі үрдіс жалғасын таппақ.
— Жақында медициналық көмек көрсету орталығы келіп Наурыз мерекесіне орай шараны ұйымдастыруда көмек көрсетуімізге өтініш білдірді. Сондай-ақ біз қаламыздың әуежайы ұжымымен де әріптестік байланыс орнаттық. Мерекелік шаларына қатыса жүріп, біз неміс ұлтының салт — дәстүрлері жайлы ақпарат беріп, ұлттық мейрамдарымыз жайлы айтамыз. Жалпы, Наурыз мерекесінің мәні халықтың арасындағы береке — бірлікті нығайту, ынтымақ пен татулықтың тұғырын бекіте түсу деп білемін. Осы орайда еліміздің аумағын мекендеп жатқан этностардың бір-бірінің салт-дәстүрлері жайлы хабардар болуы, біліп жүруі өзара түсіністік пен сыйластықтың артуына септігін тигізеді деген ойдамын, — деді Ольга Мюллер.
Ольга Мюллер неміс ұлттық орталығы жыл сайынғы дәстүр бойынша қаламыздың Орталық алаңында Наурыз мейрамының кеңінен аталып өтуіне атсалысатынын айтады. Дәлірек айтқанда, ұлттық салт — дәстүрлерін паш етіп, тарихы, мейрамдары жайлы мағлұмат беретін арнайы көрмелер ұйымдастырылмақ. Бұдан бөлек «Айнхайт» ән — би ансамблі сахна төрінде жиналған қауым алдында ән шырқап, би билеп өнер көрсетпек.
— Көрмеге қойылатын бұйымдарды арнайы қолөнер сабақтарында біздің бірлестіктің мүшелері жасайды. Орталықтың құрамында жастар клубы жұмыс істеуде. Ол клубтың мүшелері ұлттық киімдерімізді киіп, Орталық алаңға келген халықты Наурыз мерекесімен құттықтап, оларға парақшалар тарататын болады. Осының өзін жақсы бастама дер едім, себебі, Наурыз мерекесінің мазмұнына сай, халық арасындағы татулықты нығайтуға септігі мол болады,- дейді неміс ұлттық орталығы төрайымының орынбасары.
Ольга Мюллер Ұлыстың ұлы күнінің неміс халқының ұлттық мерекелерімен ұқсас жерлері барын да атап өтті. Мәселен, Наурыз келгенде, Қызыр баба даланы шарлап, әр шаңыраққа соғып бата береді деген түсінік болса, неміс ұлтының Рождество мерекесінде әулие Клаус әр үйге кіріп, ондағы жанұяларға сыйлықтар қалдырып кетеді деген ұғым бар. Өзі байқаған ортақ жайттарды айта келе, Ольга Мюллер бұл мерекенің тарихы тереңде жатқан, ерекше сипатқа ие, мазмұны тұңғиық, мәні бай мейрам ретінде қазақстандықтардың, өңір жұртшылығының өмірінде ерекше орын алып келе жатқанын атап өтіп, қала тұрғындарын алда келе жатқан Әз Наурыз мерекесімен құттықтап, татулық тірегінің нығаюына, әр жанұяда шаттық пен қуаныштың мол болуына, еліміздің бақ-дәулетінің жылдан — жылға арта түсуіне шын жүректен тілектес екендігін жеткізді.
Мирас ҚҰСАЙЫН,
«Семей таңы»
