Semeytany.kz — Батыс Қазақстан облысында болған ауыр жол апатынан 3 адам оқиға орнында қаза тапты. Тағы бір адам түрлі жарақатпен ауруханаға жеткізілді, деп хабарлайды Stan.kz ақпарат агенттігі.
Полиция дерегінше, қайғылы оқиға 16 желтоқсан күні кешкі сағат 20:30 шамасында Орал – Кирсаново тас жолының 14-шақырымында, Володарское кентінен 2 шақырым жерде тіркелген. 1989 жылы туған жүргізуші басқарған KIA K5 көлігі рульге ие бола алмай, қарсы қозғалыс жолағына шығып кеткен. Салдарынан ол 1974 жылы туған жүргізуші тізгіндеген ВАЗ-2104 көлігімен соқтығысқан.
Соққының салдарынан ВАЗ-2104 жүргізушісі және екі жолаушысы алған жарақаттарынан сол жерде жан тапсырған. Көліктегі тағы бір жолаушы Орал қаласындағы көпсалалы ауруханаға жеткізіліп, тексеру мен медициналық көмек көрсетіліп жатыр.
Ведомство мәліметінше, апатқа қатысы бар екі көлік те арнайы айып тұрағына қойылған. Аталған дерек бойынша Қылмыстық кодекстің 345-бабы 4-бөлігімен іс қозғалып, KIA K5 жүргізушісі ұсталып, уақытша ұстау изоляторына қамалды. Қазір оқиғаның барлық мән-жайы анықталуда.
