Күн санап медицина саласы қарқынды даму үстінде. Әсіресе бірер жыл бұрын обыр дертінің аты аталса, үреймен қарайтын едік. Бірақ қазір жағдай өзгерген. Заманауи технологиямен жабдықталған, білікті мамандарды бір орталыққа топтастырған Семей өңірлік онкологиялық диспансері адам өміріне араша түсіп, «аты жаман аурудан» азапқа түскендерді азат етуде.
{jcomments on}Онкологиялық диспансер қазіргі таңда қарқынды жұмыс жасап, аталған емдеу мекемесінің базасында жуырда радиациялық онкологиялық орталық және ядролық медицина орталығы ашылады. Ядролық медицина орталығы – еліміздегі жалғыз ядролық медицина ошағы болмақ. Қазірдің өзінде қаламыздағы онкологиялық диспансер материалдық база, құрылғылар, тәжірибелі мамандар жағынан еліміздегі бірден — бір орталық болып саналады.
— Біздің онкологиялық орталық — заманауи құрылғылармен жабдықталған, шет елдерден білім алған білікті мамандармен қамтамасыз етілген радиациялық онкология мен ядролық медицина орталығы бар еліміздегі жалғыз диспансер. Оның үстіне алдағы уақытта дертті жеңуге қажетті дәрі –дәрмекті орталықтың өзінде өндіру де жоспарланып отыр. Диагностика және терапия бөлімдері де кеңейтілмек,- дейді Семей қалалық өңірлік онкологиялық диспансер директорының радиологиялық қызмет жөніндегі орынбасары Баян Атантаева.
Материалдық-техникалық мүмкіндігіне тоқталсақ, диспансер онкологиялық көмекті дамытудың 2012 — 2016 жылдарға арналған бағдарламасы негізінде компьютерлі томография, «Брахитерапия» сынды Еуропалық заманауи құрылғылармен қамтамасыз етілген. Бұл құрыл- ғылармен қатар, сүт безі ауруларымен ауыратын науқастарға арналған «Си-дуга» деп аталатын рентгендік сандық аппарат, магнитті-резонанстық томография, референс-зертхана, диагностикалаудың жоғарғы көрсеткішті құрылғы — гамма камерасы бар. Сонымен бірге диспансердің дәрігерлерінен бастап медбикелеріне дейін Корея, Жапония және өзге де онкологиялық медицинасы қарқынды дамыған мемлекеттерде біліктілік арттыру курстарынан өтуді дәстүрге айналдырған.
Дәрігерлердің пікіріне сүйенсек, қауқары зор құрылғы мен білікті маман еңбегінің ұштасуынан науқастарды обыр дертінен құтқарудың үлес салмағы артқан. Статистикалық мәліметтерге сүйенсек, жыл сайын Семей аумағы бойынша 1300-ден астам адам онкологиялық тіркеуге алынады. Әсіресе қатерлі ісік аурулары арасында сүт безі обыры, қатерлі өкпе обыры, асқазан қатерлі ісігі, ұйқы безі обырлары жиі кездеседі. Десе де дер кезінде аталған дерттің алдын алу үшін барлық жағдайлар жасалып жатыр.
— Қатерлі ісікті дер кезінде анықтап, науқастардың өлімін азайту, өмір сүру жасын ұзарту мақсатында 2005 жылдан бері скринингтік тексеру жүргізіп келеміз. Бұл тексеру дертті алғашқы сатысында анықтап, жедел түрде толықтай емдеуге мүмкіндік береді. Жыл сайын шаһардың 120 мың ересек тұрғыны мұндай тегін тексеруден өтеді,- дейді Семей қалалық өңірлік онкологиялық диспансердің медициналық қызмет сапасын қадағалау бөлімінің басшысы Мұхтарғазы Төлеутаев.
Скринигтік тексерулер арқасында дертке шалыққандардың 70 пайызының ауруы алғашқы сатысында анықталып, ем жасаған соң, толыққанды сауығып кетулеріне мүмкіндік туып отыр екен. Бес жыл бұрын қала тұрғындарының орташа өмір сүру жасының ұзақтығы 66 жас болса, қазіргі таңда 69 жасқа артқан. Дәрігер бұл жетістікті халықтың әл-ауқатының артуымен, медицина саласының серпінді дамуымен байланыстырады.
-«Ауырып ем іздегенше, ауырмайтын жол ізде» демекші, алдын ала скринингтен өтудің маңызы зор, халықтың өз денсаулығына мұ-қият болғандығы жөн,-дейді Мұхтарғазы Төлеутаев бізбен әңгімесінде.
