Semeytany.kz — Бүгін облыс әкімі Берік Уәлидің төрағалығымен өңірде «Таза Қазақстан» экологиялық бағдарламасының іске асырылу барысы талқыланған мәжіліс өтті. Жиынға облыстық басқарма басшылары мен өңірлік департамент жетекшілері қатысып, аудан-қала әкімдері бейнебайланыс арқылы қосылды.
Күн тәртібіндегі негізгі мәселе бойынша облыстық табиғи ресурстар және табиғат пайдалануды реттеу басқармасының басшысы Марат Теміржанов баяндама жасады. Оның айтуынша, биыл сәуір мен қараша аралығында елді мекендерді санитарлық тазалау жұмыстары жүйелі жүргізілген. Осы кезеңде 349 мың тұрғын атсалысып, 15 906 ұйым мен 6 371 техника жұмылдырылған. Нәтижесінде 182 мың аула тазартылып, 52 мың тонна қатты тұрмыстық қалдық шығарылған.
Сонымен қатар «Ғарыш Сапары» ғарыштық мониторингі арқылы облыс аумағында 191 рұқсат етілмеген қоқыс үйіндісі анықталғаны айтылды. Қазіргі уақытта оларды жою жұмыстары жүргізіліп жатыр. Көгалдандыру жөніндегі өңірлік жоспарға сәйкес, 2026 жылы жалпы 67 000 түп көшет отырғызу көзделген: көктемде 42 000, күзде 25 000 түп көшет дайындалады.
Аймақ басшысы мәжілісте бағдарлама аясындағы жұмыстардың нәтиже беріп жатқанын атап өтіп, қарқынды бәсеңдетпеуді тапсырды. Атап айтқанда, қалалар мен аудандарда санитарлық тазалаудың сапасы мен тұрақтылығын қамтамасыз ету үшін күнделікті мониторинг жүргізу, фото-бейне бақылауды күшейту, бастаманы тұрғындар арасында кеңінен насихаттау, сондай-ақ 2026 жылғы көктемгі ағаш отырғызу жұмыстарын 1 маусымға дейін толық аяқтау міндеті жүктелді.
Берік Уәлидің айтуынша, Президент бастамасымен қабылданған «Таза Қазақстан» экологиялық бағдарламасын өңірде іске асыруға ерекше басымдық беріліп келеді және бұл бастама тұрғындар тарапынан кең қолдау тапқан. Осы бағытта бүгінге дейін 13 арнайы жиын өткізіліп, тазалық пен абаттандыру мәселелеріне қатысты 102 нақты хаттамалық тапсырма берілген. Облыс әкімі аталған жұмысты жүйелі түрде жалғастыру қажеттігін қадап айтты.
Кілт сөздер: Таза Қазақстан, Абай облысы, Берік Уәли, санитарлық тазалау, көгалдандыру жоспары
