Semeytany.kz — бүгін Абай облысының әкімі Берік Уәли Семейдегі ірі экспорттаушы кәсіпорындардың бірі – «Казполиграф» ЖШС базасында ашылған «Gable Top» картон қаптамалар цехының салтанатты іске қосылуына қатысты.
Жаңа өндірістік желі өңірдің индустриялық әлеуетін арттырып, экспорттық бағытты кеңейтуге мүмкіндік береді. Аймақ басшысы бұл жобаны өндірістегі технологиялық жаңғырту мен жаңа жұмыс орындарын құруға бағытталған нақты қадам ретінде бағалады.
«Казполиграф» кәсіпорны шығаратын картон қаптама өнімдерінің 30 пайызы ТМД елдеріне, соның ішінде Ресей, Қырғызстан, Өзбекстан және өзге де нарықтарға экспортталады. Компанияның өндірістік қуаты жылына 30 мың тонна қағаз және картон қаптамасын, 2 мың тонна жабынды қағазды, 1,5 мың тонна полимерлік пленкадан жасалған қаптама бұйымдарын және 1 мың тонна өзге қағаз-картон түрлерінен өндірілетін сығымдалған өнімдерді шығаруға жетеді. Өндірісте 700-ге жуық адам еңбек етеді.
Жобаға салынған жалпы инвестиция көлемі 6 миллиард теңгені құрайды. Жаңа желі 20-ға жуық тұрақты жұмыс орнын ашуға жол ашып отыр. Сонымен қатар компания биыл өндірістік қуаттарды жаңарту бойынша ауқымды модернизацияны аяқтап, еуропалық стандарттарға сай жабдықтарды сатып алып, орнатқан. Бұл өндіріс көлемін шамамен төрт есе арттырып, тапсырыстарды жедел орындауға мүмкіндік бермек.
Айта кетейік, іске қосылған кешен Еуразиялық экономикалық одақ пен Орталық Азия кеңістігінде халықаралық «Tetra Pak» стандарттары бойынша сертификатталған қаптама материалдарын шығаратын жалғыз өндіріс ретінде аталып отыр.
Өңірде өндіріс саласындағы жобалар қатар көбейіп келеді. Мәселен, «Qazaq Astyq Group» ЖШС 2026 жылдың бірінші тоқсанында жылына 72 мың тонна тазартылған күнбағыс майын өндіретін зауытты іске қосуды жоспарлап отыр. Жаңасемей ауданында ірі қара, қой және жылқы етін өңдейтін ет комбинатының құрылысы жүріп жатыр. Сондай-ақ 2028 жылға дейін жылына 250 мың дана тері өңдейтін «Eastern Protein» ЖШС кәсіпорны және жылына 36 мың тонна сүтті қайта өңдейтін «Ертіс Өнімдері» ЖШС зауыты іске қосылмақ. Бұдан бөлек, майлы дақылдарды қайта өңдеуге бағытталған үш агрожобаны жүзеге асыру көзделген.
