Мәжіліс депутаты Олжас Нұралдинов қадамжетімділік (үй маңындағы) дүкендерді әлеуметтік маңызы бар азық-түлік тауарларына (ӘМАЗТ) қатысты сауда үстемесін әкімшілік реттеуден босатуды ұсынды, деп хабарлайды Semeytany.kz тілшісі informburo.kz сайтына сілтеме бере отырып.
Депутаттың айтуынша, әлеуметтік маңызы бар азық-түлік тауарлар тізімін кеңейту шағын бөлшек саудаға қосымша салмақ түсіреді. Әсіресе тез бұзылатын өнімдер (сақтау шарты күрделі, жарамдылық мерзімі қысқа) көбейген сайын дүкендердегі есептен шығару көлемі артып, шығын да ұлғаяды. Оның үстіне, үй жанындағы дүкендердің табыстылығы онсыз да төмен: сала деректері бойынша маржа орта есеппен 2–8% аралығында ғана. Бұл көрсеткіш негізінен жалдау ақысы, жалақы, логистика және коммуналдық төлем сияқты міндетті шығындарды жабуға әрең жетеді.
Нұралдинов сондай-ақ көптеген шағын дүкен жалға алынған нысандарда жұмыс істейтінін атап өтті. Коммуналдық тарифтердің өсуі және айналымнан алынатын салықты төлеу қажеттілігі жағдайында кәсіпкерлердің бір бөлігі шығынға жұмыс істеуге мәжбүр болып отыр. Осы себепті бағаны қатаң шектеу кей дүкендердің жабылып қалуына әкелуі мүмкін деген уәж айтылды.
Ұсыныс бойынша, кеңейтілген әлеуметтік маңызы бар азық-түлік тауарлар тізіміндегі баға/үстеме шектеуі негізінен ірі желілік сауда орындарына қолданылуы тиіс. Ал егер реттеу шағын дүкендерге де сақталатын болса, онда оларды әлеуметтік маңызы бар тауарларды арзан бағамен сатып алуға қол жеткізетін тетікпен қамтамасыз ету қажет. Депутат мұндай мүмкіндік әлеуметтік-кәсіпкерлік корпорациялар (ӘКК) арқылы ұйымдастырылуы мүмкін екенін жеткізді.
Айта кетейік, 4 желтоқсанда Сауда және интеграция министрлігі әлеуметтік маңызы бар азық-түлік тауарлар тізімін тағы 14 позицияға кеңейту жоспарын мәлімдеген. Жаңа ұсыныстар қатарында ет, балық, көкөніс, ірімшік, қара шай және басқа да тауарлар бар. Бұл бастаманы іске асыруды жеделдету туралы тапсырманы Премьер-министр Олжас Бектенов берген.
