Semeytany.kz — Талдықорғанда 32 жастағы Айзат Жұманованың өліміне қатысты сот отырысы жалғасып жатыр. Кезекті тыңдауда марқұмды облыстық ауруханаға жеткізген сәттің бейнежазбасы көпшілікке ұсынылды, деп жазды Stan.kz ақпарат агенттігі.
Отырыста көрсетілген кадрларда Айзат Жұманованың арбамен әкелінгені, басы шалқайып, ес-түссіз күйде болғаны байқалады. Видеода күйеуі Айбар Жанболаттың әйелін маңдайынан сүйіп кеткені, кейін дәлізде марқұмның енесі келіп, ұлымен бірге Айзаттың аяғына массаж жасап, басын қозғап, бетін суланған шүберекпен сүрткен сәттері де көрінеді.
Тергеу нұсқасына сәйкес, қайғылы оқиға 21-інен 22 маусымға қараған түні болған. Күдікті әйелін аулаға шығарып, бірнеше рет соққы жасағаны, Айзат тоқтатуды сұраса да ұрып-соғу тоқтамағаны айтылды. Әйел есінен танып қалғаннан кейін де соққы жалғасқан деген мәлімет келтірілді. Сол түні ер адамның мас күйде болғаны да сөз болды. Кейін Айзат Талдықорғандағы облыстық ауруханаға жеткізіліп, жансақтау бөліміне жатқызылғанымен, артынша көз жұмған.
Марқұмның анасы сотта қызының қаза болғанын таңертең ғана естігенін, ал шын мәнінде Айзат шамамен түнгі үштер шамасында қайтыс болғанын айтты. Сондай-ақ қызының бұрын да күйеуінің ашушаң мінезіне шағымданғанын жеткізген.
Сот барысында уақытылы медициналық көмектің көрсетілу-көрсетілмеуі де талқыланды. Көрсетілген видеода дәрігерлердің әрекеті баяу болғандай әсер қалдыратыны айтылды.
Сот-медициналық сарапшылардың дерегінше, Айзаттың жарақаттарының басым бөлігі тірі кезінде салынған. Сарапшы Тахир Халимназаров өлімнің тікелей себебі бас-ми жарақаты екенін, бас сүйектің түбінде жарық барын, сондай-ақ бірнеше рет соққы жасалғанын мәлімдеді. Оның айтуынша, жарақаттар құлау салдарынан пайда болмаған және соққылар ауыр, бірақ өткір емес затпен жасалған болуы мүмкін.
Бұған дейін, 2025 жылдың маусымында Жетісу облысы Ақсу ауданына қарасты Баласаз ауылында Айзат Жұманованың қаза тапқаны хабарланған. Күдікті ретінде күйеуі Айбар Жанболат қамауға алынған. Туыстарының айтуынша, әйелдің қазасына қатысты оқиғаның мән-жайы жан-жақты тексеріліп жатыр.
