Semeytany.kz — Облыс әкімі Берік Уәли Мақаншы ауданындағы Бекет ауылына арнайы барып, жаңадан салынған су құбыры жүйесінің жұмысымен танысты. Елді мекендегі ауыз су жүйесінің құрылысы 2024 жылы басталып, биыл толық аяқталды.
Жоба аясында ауылдың 6 көшесіне су құбыры тартылды. Су беру станциясында тереңдігі 120 метр болатын екі ұңғыма қазылып, сыйымдылығы 100 текше метрден екі резервуар, сорғы станциясы, электр дизельді генератор және трансформаторлық қосалқы станция орнатылған. Нәтижесінде ауылдағы 96 аула орталықтандырылған ауыз суға қосылды.
Бекет ауылында 334 адам тұрады. Мұнда бір фельдшерлік-акушерлік пункт пен бір дүкен жұмыс істейді. Жаңа су жүйесі тұрғындардың тұрмыс сапасын жақсартып, ауылдың әлеуметтік дамуына серпін береді деп күтілуде.
Аймақ басшысы ауыл халқы үшін ауыз судың маңызы ерекше екенін атап өтті. «Ауыл тұрғындарының әл-ауқатын арттыру – біздің ең басты міндетіміз. Бекет ауылында салынған су жүйесі барлық талапқа сай келеді. Бұл – тұрғындардың көп жылдан бергі мәселесін шешкен маңызды жоба», – деді Берік Уәли.
Тұрғындар да көптен күткен мәселенің шешілгеніне ризашылық білдірді. Ауыл тұрғыны Әдина Әміржанованың айтуынша, елді мекенде соңғы жылдары жақсы жаңалықтар көбейген: балалар ойнайтын саябақ бар, фельдшерлік пункт салынған, су мен жарық тартылған, көшелер асфальтталған. «Қаладан еш кем емеспіз», – дейді ол.
