Semeytany.kz — Жаңа жыл қарсаңында Абай облысының әкімі Берік Уәли Семей қаласындағы арнайы мектеп-интернаттар мен арнаулы әлеуметтік қызметтерге мұқтаж балаларды қолдау орталығын аралап, мекемелердің тыныс-тіршілігімен танысты. Аймақ басшысы тәрбиеленушілер мен ұжымдарды мерекемен құттықтады.
Әуелі облыс әкімі №4 арнайы мектеп-инернатына барды. Нашар еститін балаларға арналған бұл білім ордасы 100 орынға шақталған. Қазір мұнда 80 оқушы оқиды, олардың 67-сі — мүгедектігі бар балалар. Интернатта 17 сынып-комплект жұмыс істейді, 49 педагог қызмет атқарады, оның ішінде 14 тәрбиелеуші ұстаз бар. Мекемеде бейімделген жатын корпус (65 орын), 21 оқу кабинеті, 6 логопед кабинеті, қыздар мен ұлдарға арналған екі шеберхана, есту қабілетін жетілдіру кабинеті, бейімделген спорт залы, кітапхана, 90 орындық асхана және медициналық пункт қарастырылған. Мектепте спортқа да ерекше көңіл бөлінеді. Түлек Данияр Тайменов — қол күресінен сегіз дүркін әлем және жиырма дүркін Азия чемпионы.
Сондай-ақ аймақ басшысы арнаулы әлеуметтік қызметтерге мұқтаж балаларды қолдау орталығында болды. Бұл мекеме ата-анасының қамқорлығынсыз қалған және қиын өмірлік жағдайға тап болған балаларды тәрбиелеуге, олардың қауіпсіз дамуына жағдай жасауға бағытталған. Орталықта 72 тәрбиеленуші бар, олар Семей қаласындағы №20, №27 және №35 мектептерде білім алады. Мұнда 75 орындық асхана, педагог-психолог кабинеттері, қыздарға арналған қол еңбегі кабинеті, ұлдарға арналған шеберхана, «Интеллектум» дамыту кабинеті, бейнелеу өнері студиясы, әдіскер кабинеті, вокал және логопед кабинеттері, әлеуметтік-тұрмыстық бейімдеу бөлмелері, медициналық пункт, кітапхана, күрес залы, шағын тренажер залы және демалыс аймағы бар. Орталық қызметкерлері спорт залының қолайсыз екенін айтып, көмек сұраған.
«Интернатты аралағанда спорт залдың өте тар екенін байқадым. Жобасын дайындап, ұсыныңыздар. Спорт залын салуға көмектесеміз», – деді облыс әкімі.
Бұдан кейін Берік Уәли №5 арнайы мектеп-интернатының жұмысымен танысты. Бұл мекеме есту қабілеті бұзылған, естімейтін және сөйлеу тілінде ауыр бұзылыстары бар балаларды оқытуға арналған. Қазіргі таңда мұнда 129 оқушы білім алады, оның 43-і — мүгедектігі бар балалар. Мектепте 21 оқу сыныбы жұмыс істейді, оқу-тәрбие үдерісіне 76 педагог жауапты. Арнайы педагогтар, дефектологтар, логопедтер және өзге де бейінді мамандар балалардың жеке ерекшеліктерін ескеріп, түзету-дамыту бағдарламаларын жүзеге асырады. Интернатта 27 оқу кабинеті, 11 жатын бөлме, спорт залы, кітапхана, 80 орындық акт залы, 110 орындық асхана, медициналық пункт бар.
Аймақ басшысы әлеуметтік мекемелердің қызметкерлерімен және тәрбиеленушілермен жүздесіп, балалардың өнерін тамашалап, мерекелік тілегін жеткізді. Сонымен бірге мекемелердің қажеттіліктерін ескере отырып, №4 арнайы мектеп-интернатына екі ноутбук, балаларды қолдау орталығына өнеркәсіптік қамыр илеу құрылғысы, №5 арнайы мектеп-интернатына интерактивті тақта сыйға тартылды.
Одан бөлек, осы үш мекемеде тәрбиеленіп жатқан 274 балаға бірдей үлгідегі жаңа жылдық тәтті сыйлықтар үлестірілді. Мұндай сыйлықтар облыстағы өзге 5 әлеуметтік мекемеге де таратылды.
