Semeytany.kz — Жаңасемей ауданына қарасты Шаған кентінде орталық су құбыры іске қосылды. Жаңа нысанның ашылу рәсіміне Абай облысының әкімі Берік Уәли қатысып, тұрғындарды Жаңа жыл қарсаңында қуанышты жаңалықпен құттықтады.
Шаған кенті облыс орталығынан 75 шақырым қашықтықта орналасқан, мұнда 569 адам тұрады. Аймақ басшысы су құбырының іске қосылуы ауылдағы тұрмыс сапасын арттырып, әлеуметтік инфрақұрылымды дамытуға серпін беретінін айтты. Сондай-ақ Мемлекет басшысының халықты сапалы ауыз сумен қамтамасыз ету тапсырмасына сай өңірде 33 жоба қатар жүзеге асып жатқанын жеткізді.
Жобаның құрылыс жұмыстары былтыр басталып, биыл толық аяқталған. Нәтижесінде 1 және 2 көтергіш сорғы станциялары, КТПН қондырғысы, су тазарту жүйесі, таза суға арналған резервуарлар салынды. Бұған қоса, кент ішіне жалпы ұзындығы 19 шақырым болатын су құбыры желілері тартылды. Жаңа жүйе тұрғындарды тұрақты әрі таза ауыз сумен қамтып қана қоймай, елді мекеннің өрт қауіпсіздігін күшейтуге де мүмкіндік бермек.
Бұған дейін Шағанда орталықтандырылған су құбыры мүлде болмаған. Халық суды ұңғымалар мен колонкалардан тасып пайдаланып келген. Тұрғындар көптен күткен су құбыры пайдалануға берілгеніне ризашылық білдіріп, ауылда жарық, жол секілді өзге де мәселелер бойынша атқарылған жұмыстарға оң бағасын берді.
Аймақтағы жұмыстар мұнымен тоқтамайды. Биыл Жаңасемей ауданының Алғабас және Приречное ауылдарына да ауыз су жеткізілгені айтылды.
