Семей қаласының тұрғыны жөндеу бригадасымен (бұдан әрі – Орындаушы) 5 500 000 теңгеге шарт жасасқан. Шарт талаптарына сәйкес, жұмыстар белгіленген мерзімде аяқталуы тиіс болатын.
Алайда, Орындаушы өз міндеттемесін уақытында орындамаған, жөндеу жұмыстары мерзімінде аяқталмаған, ал жұмысшылар нысанға сирек келе бастаған.
Тапсырыс беруші бірнеше рет Орындаушыға жүгінген, алайда тек бос уәделер алған.
Қазақстан Республикасының «Тұтынушылардың құқықтарын қорғау туралы» Заңының 34-бабының 1-тармағына сәйкес, егер Қазақстан Республикасының заңдарында өзгеше белгіленбесе, орындаушы жұмысты орындау (қызмет көрсету) туралы шартта белгіленген мерзімде жұмысты орындауға (қызмет көрсетуге) міндетті.
Сондай-ақ, аталған Заңның 35-бабының 5-тармағына сәйкес жұмысты орындауды (қызмет көрсетуді) бастау және аяқтау мерзімдерін бұзғаны үшін, сондай-ақ жұмыстағы (көрсетілетін қызметтегі) кемшіліктерді жою мерзімдерін бұзғаны үшін орындаушы, егер шартта, Қазақстан Республикасының заңдарында өзгеше белгіленбесе, мерзімін өткізіп алудың әрбір күні үшін жұмыс (көрсетілетін қызмет) құнының бір пайызы мөлшерінде тұрақсыздық айыбын төлеуге тиіс.
Осыдан кейін, тапсырыс беруші «E-Өтініш» ақпараттық жүйесі арқылы Абай облысы бойынша сауда және тұтынушылардың құқықтарын қорғау департаментіне жүгінді.
Өтінішті қарау барысында Департамент қызметкері пәтер жөндеу жұмыстарының аяқталмағанын растайтын қосымша фото және бейнематериалдарды сұратты.
Тапсырыс беруші мен Орындаушы арасындағы шартты және дәлелдеме материалдарын зерделегеннен кейін, Департамент Орындаушыға қатысты жоспардан тыс тексеру тіркеді.
Тексеру нәтижесінде Орындаушыға ҚР «Тұтынушылардың құқықтарын қорғау туралы» Заңының 34-бабының 1-тармағын бұзғаны үшін Қазақстан Республикасының Әкімшілік құқық бұзушылық туралы кодексінің 190-бабының 1-бөлігі бойынша әкімшілік жауапкершілікке тартылып, айыппұл салынды.
Сонымен қатар Орындаушыға анықталған бұзушылықтарды жою және жөндеу жұмыстарын нұсқамада белгіленген мерзімде аяқтау жөнінде ұйғарым тапсырылды.
Алайда, Орындаушы Департаментке нұсқамада берілген мерзімде жұмыстарының біткендігі туралы хабарлама ұсынбады.
Департамент нұсқаманың орындалуын бақылау бойынша тексеріс ашып, тексеріс нәтижесінде нұсқаманың орындалмағандығын және жөндеу жұмыстарының аяқталмағандығын анықтады және ҚР ӘҚБтК 462-бабы 3-бөлігі бойынша хаттама толтырылып, сот органдарына жөнелтілді.
Сот органдарының қаулысы бойынша Орындаушыға 30% жеңілдікпен 70 АЕК айыппұл салынды (275 240 тенге).
Абай облысы бойынша сауда және тұтынушылардың
құқықтарын қорғау департаментінің басшысы С. Нұртазин
