Мемлекет басшысының басты басымдығы – әскери қызметтің адам өмірімен тікелей байланысты екенін ұмыттырмау. «Әскерде темірдей тәртіп болуы тиіс» деген сөз тек қатаңдықты ғана емес, әділдік пен қауіпсіздікті де қамтиды. Тәртіп сарбаздың құқығын таптау емес, керісінше оны қорғау құралына айналуы керек.
Сондай-ақ, Президенттің әскери саладағы тәрбие жұмысына ерекше тоқталуы өте орынды. Қазіргі заманда заманауи қару-жарақпен қатар, моральдық-психологиялық дайындықтың маңызы артты. Егер командир сарбазға үлгі бола алмаса, қандай технология қолданылса да, армияның ішкі тұрақтылығы әлсірейді.
Әскердің жағымды қырларын көрсету туралы айтылған пікірмен де келісемін. Әскери борышын өтеген жастарға берілетін білім беру жеңілдіктері мен әлеуметтік кепілдіктер – бұл мемлекеттің жастарға деген нақты қолдауы. Алайда, бұл мүмкіндіктер туралы ақпарат қоғамға жүйелі әрі ашық жеткізілуі қажет, сонда ғана армияға деген сенім нығаяды.
Бауыржан Момышұлы атындағы әскери мектептерді көбейту бастамасын стратегиялық инвестиция деп бағалар едім. Бұл тек әскери кадр даярлау емес, ұлттық рухы мықты, жауапкершілігі жоғары азаматтарды қалыптастыру жолы.
Қорытындылай айтқанда, Президенттің сұхбаты – армиядағы проблемаларды жасыру емес, оларды шешуге бағытталған саяси ұстанымның көрінісі. Ендігі кезекте сөз бен істің бірлігі шешуші рөл атқарады.
«Шығыс» өңірлік қолбасшылығы әскерлері қолбасшысының тәрбие және идеологиялық жұмыстар жөніндегі орынбасары
полковник Елдос Бозгулов
