Мемлекет басшысы Қасым-Жомарт Тоқаевтың бүгін «Түркістан» газетіне берген сұхбатында атап өтілген басым бағыттарды өңірде іске асыру бойынша облыс әкімі Берік Уәлидің төрағалығымен арнайы кеңес өтті. Жиынға облыстық басқарма басшылары қатысты. Аудан, қала әкімдері бейнережимде қосылды.
Аймақ басшысы кеңес барысында Президент тапсырмаларының облыста жүзеге асуына жауапты басқармаларға, аудан әкімдеріне орталық пен өңір арасындағы байланысты күшейту, инфрақұрылымдық жобаларда облыстың үлесін арттыру, цифрлық технологияларды енгізу, қандастарды қоныстандыру, әскери қызмет, туризм, ауыл шаруашылығы, көлік, денсаулық сақтау, салалары бойынша тиісті міндеттер жүктеді. Әр басқармаға, аудан әкімдеріне өз саласы бойынша нақты ұсыныстар әзірлеу тапсырылды.
«Ең алдымен, Президенттің түрлі саладағы реформалары қағазда қалмауы тиіс. Ол адам өмірінде, ауылда, ауданда, қалада сезілуі керек. Мемлекет басшысы Қасым-Жомарт Тоқаев айтып отырған әділеттілік, тиімді басқару, экономикалық дербестік – бәрі абстрактілі ұғым емес. Ол мектептің сапасынан, аурухананың қолжетімділігінен, жолдың жай-күйінен, жұмыс орнының бар-жоғынан көрінуі керек. Президентіміз Абайды ерекше құрметтеп, әрдайым Ұлы ақынды ұлттың темірқазығы ретінде көрсетіп келеді. Өңірімізде «Абайға құрмет» акциясы іске асырылуда. «Абай халқымыздың еңбекқор, білімпаз және адамгершілігі жоғары болғанын қалады. Мән-мағынасы жоқ сансыз пікірталастан басқа ұрпаққа ұлағат боларлық сөз қалдырмаған бірқатар қоғам қайраткерлерінің мұрасынан Абай ілімі әлдеқайда биік тұрғаны анық. Бірде-бір дәуірде, әсіресе, саяси аласапырандар кезеңінде көпірме сөздің еш пайдасы болмаған», – деді бүгінгі сұхбатында. Абай атын иеленген облыс болғандықтан бізге артылар жауапкершілік жүгі салмақты. Алдағы күндері сіздерден нақты ұсыныстар күтемін. Халық бізден сөз емес, нәтиже күтеді», – деді облыс әкімі.
Облыста ірі инвестициялық жобалардың бірі – көлемі 577,5 млрд. теңгені құрайтын жалпы ұзындығы 297,5 шақырым «Аягөз – Бақты» теміржол желісінің құрылысы жүргізілуде.
Мемлекет басшысының қолдауымен «Абайға құрмет» акциясы аясында еліміздің әр өңірі облысқа бір-бір нысаннан салып бермек. Қазір 15 аймақ, атап айтқанда, Маңғыстау облысы «Достық» үйін, Түркістан облысы Көрме орталығын, Солтүстік Қазақстан облысы Рәміздер алаңын, Ақтөбе облысы Жекпе-жек орталығын, Павлодар облысы Үстел теннисі кешенін, Атырау облысы «Абай әлемі» кітапханасын, Қызылорда облысы «Анаға тағзым» ғимаратын, Қостанай облысы Руханият орталығын, Қарағанды облысы Ботаникалық саябақ, Батыс Қазақстан облысы желілік саябақ, Астана қаласы «Келешек» мектебін, Алматы қаласы медиа орталығын, Шымкент қаласы Шығармашылық орталығын салуға, Шығыс Қазақстан облысы Ертіс жағалауын абаттандыруға жобалық жұмыстарды белсенді жүргізіп жатыр.
