Semeytany.kz — Абай облысының әкімі Берік Уәли Парламент Мәжілісінің депутаты, аграрлық мәселелер комитетінің мүшесі, «Ауыл» партиясы фракциясының мүшесі Жигули Дайрабаевпен кездесті.
Жиынға «Ауыл» партиясы орталық аппаратының қызметкері Ерлан Жанатаев пен партияның облыстық филиалының төрағасы Қайрат Смағұлов та қатысты. Кездесуде Мемлекет басшысы Қасым-Жомарт Тоқаевтың «Түркістан» газетінде жарияланған сұхбатында ауыл шаруашылығы саласына қатысты жүктелген міндеттерді өңірде орындау барысы талқыланды.
Аймақ басшысы облыстың аграрлық әлеуетіне тоқталып, салада жүзеге асып жатқан инвестициялық жобалар туралы мәлімет берді. Ал Мәжіліс депутаты агроөнеркәсіп кешеніне қатысты мемлекеттік бағдарламалар мен жеңілдіктерді атап өтіп, өңірдегі өзекті мәселелерді тиісті министрліктерге депутаттық сауал ретінде көтеруге дайын екенін жеткізді. Жұмыс сапары аясында ол фермерлермен және ауыл шаруашылығы саласының өкілдерімен кездесуді жоспарлап отыр.
Облыста ауыл шаруашылығы саласының 2031 жылға дейінгі өңірлік инвестициялық жобалар картасы әзірленген. Даму моделі ет кластерін құруды, сүт-тауарлы фермалар салуды, етті құс шаруашылығын дамытуды және суармалы егіншіліктің әлеуетін толық пайдалануды көздейді. Осы бағыттар бойынша өңірде 85 ірі жобаны іске асыру жоспарланған. Оның ішінде Семей қаласында 23,8 млрд теңгеге 6 инвестициялық жобаны жүзеге асыру қарастырылған.
Жоспарға сәйкес, 2028 жылға дейін жылына 250 мың дана тері өңдейтін «Eastern Protein» ЖШС өндірістік нысанын және жылына 36 мың тонна сүтті қайта өңдейтін «Ертіс Өнімдері» ЖШС зауытын іске қосу көзделіп отыр. Бұдан бөлек, майлы дақылдарды қайта өңдеуге бағытталған үш агрожобаны жүзеге асыру жоспарланған.
Қазіргі таңда «Eurasia Agro Semey» ЖШС Жаңасемей ауданында ауысымына 35 тонна ет өңдейтін комбинат құрылысын жүргізіп жатыр. Жоба 2026 жылғы тамызда аяқталады деп жоспарлануда.
