2025 жылы Абай облысында ауыл шаруашылығы дақылдарының егін жинау алаңы 782,1 мың гектарды құрады. Бұл өткен жылмен салыстырғанда 22,0 мың гектарға артық, яғни егіс көлемінің ұлғайғанын көрсетеді.
Өңірде күзгі жиын-терім науқаны 1 желтоқсанда толық аяқталды. Дәнді және дәнді-бұршақты дақылдар егілген алқаптардан 348,9 мың тонна астық бастырылды. Сонымен қатар, майлы дақылдардың егіс алаңы өткен жылмен салыстырғанда 42,5 мың гектарға артты. Нәтижесінде орташа өнімділік 15,0 центнерді құрап, жалпы жиналған өнім көлемі 509,2 мың тоннадан асып, рекордтық көрсеткішке қол жеткізілді.
Материалдық-техникалық базаны жаңарту бағытында да нақты нәтижелер бар. Жыл басынан бері 592 бірлік жаңа ауыл шаруашылығы техникасы сатып алынып, техника паркін жаңарту деңгейі 6,7 пайызды құрады. Бұл көрсеткіш жоспарланған 6,5 пайыздан жоғары.
Мемлекеттік қолдау тетіктері де тиімді іске асырылуда. «Кең дала» бағдарламасы аясында ағымдағы жылы облыстың 202 диқаншысы 9,5 млрд теңге көлемінде несие алды. Бұл өткен жылмен салыстырғанда несиелендіру көлемінің 4,6 млрд теңгеге артқанын білдіреді.
Сонымен қатар, 2025 жылға «Ауыл аманаты» бағдарламасын іске асыруға 1,0 млрд теңге бөлінді. Қазіргі таңда облыстың 10 ауданы бойынша жалпы сомасы 2,8 млрд теңгені құрайтын 326 жобаның тізбесі қалыптастырылып, Қазақстан Республикасы Ұлттық экономика министрлігінде тиісті қорғаудан өтті.
Жалпы алғанда, атқарылған жұмыстар ауыл шаруашылығы саласының тұрақты дамуын қамтамасыз етіп, өңірдің аграрлық әлеуетін арттыруға бағытталған.
