Semeytany.kz — 2025 жылы Ақсуат ауданында шағын кәсіпкерлікті дамыту, кәсіп иелерінің шаруашылықтарын кеңейту, мүліктерін жаңарту және жаңа сауда орындарын ашу бағытында жұмыстар күшейді.
Қазіргі таңда ауданда 1961 шағын кәсіпкерлік субъектісі тіркеліп, тұрақты жұмыс істеп тұр. Оның ішінде 107 заңды тұлға, 692 жеке кәсіпкер және 1162 шаруа қожалығы бар. Сондай-ақ аудан аумағында 131 сауда дүкені, 1 сауда базары, 28 қоғамдық тамақтандыру орны, 53 қызмет көрсету нысаны, 7 жанар-жағармай құю стансасы, 7 дәріхана және 10 шағын наубайхана халыққа қызмет көрсетіп келеді.
2025 жылы жеке кәсіпкерлердің бастамасымен бірқатар нысан пайдалануға берілді. Аудан орталығында мейрамхана, екі тойхана, бес сауда дүкені және автокөлік жуу орталығы ашылса, Екпін ауылында бір дүкен мен екі монша жұмысын бастаған.
Қазір Ақсуат ауылында екі қабатты сауда және қонақ үй кешенінің, сондай-ақ ауданға кіреберіс бөлігінде сауда және қоғамдық тамақтану нысанының құрылысы жүріп жатыр. Бұдан бөлек, «Qazaq Oil Partners» бағдарламасы аясында жанар-жағармай және газ құю стансасын салу қолға алынған. Аталған нысандарды 2026 жылдың бірінші жартыжылдығында пайдалануға беру көзделіп отыр.
Сонымен қатар, ауданның бірқатар шаруа қожалығы облыстың индустрияландыру картасына енгізіліп, «Семей» әлеуметтік-кәсіпкерлік корпорациясы арқылы жеңілдетілген пайыздық мөлшерлемемен несие алған. Осы жобалар аясында 5000 басқа арналған мал бордақылау алаңы, жасанды тоғандарда балық өсіру және 5000 бас қой шаруашылығын дамыту бағытындағы бастамалар іске асырылуда. Жобалардың жалпы қаржыландыру көлемі 2,7 млрд теңгені құрайды.
Бұған қоса, өндірістік бағыттағы жобалар да жүзеге асып келеді. Жеке кәсіпкерлер ауыл шаруашылығы қалдықтарын қайта өңдеу, ет және сүт өнімдерін өндіру бағытында жұмыс жүргізіп, дайын өнімді аудандық жәрмеңкелер арқылы тұрғындарға ұсынып отыр.
