Semeytany.kz — ҚР Парламенті Мәжілісінің депутаты, «AMANAT» партиясы фракциясының мүшесі Нұртай Сабильянов Аягөз ауданына жұмыс сапарымен барып, Аягөз қаласында, сондай-ақ Ақшәулі және Мыңбұлақ ауылдарында тұрғындармен ашық форматта кездесті.
Кездесу барысында халықтың мұң-мұқтажы мен ұсыныстары тыңдалып, бірқатар әлеуметтік және инфрақұрылымдық түйткіл сөз болды. Аягөз қаласында Семей ядролық полигонынан зардап шеккен азаматтарды әлеуметтік қолдау, тұрғын үймен қамту, жол жөндеу, жедел жәрдем қызметін аудандық аурухана қарамағына беру, ауыл шаруашылығына жеңілдетілген несие беру, білім саласын қаржыландыру және экологиялық қауіпсіздік мәселелері көтерілді. Сонымен бірге депутат азаматтарды жеке қабылдап, өтініш-тілектерін тыңдады.
Сапар аясында Нұртай Сабильянов Аягөз қаласында «Келешек мектептер» ұлттық жобасы бойынша салынған жаңа мектепке барып, оқу орнының жұмысымен танысып, ұстаздармен кездесті.
Ақшәулі ауылында тұрғындар мектепке спортзал салу қажеттігін, жедел жәрдем көлігін жаңарту, дәрігермен қамтамасыз ету, ауыл шаруашылығын дамыту және мал соятын алаңды ретке келтіру мәселелерін айтты.
Ал Мыңбұлақ ауылында 28 шақырым жолды асфальттау, дәрігерлік амбулаторияға маман тарту, жедел жәрдем көлігімен қамту, тұрғын үй салу, ауыз су түйткілі, ауыл шаруашылығын қолдау және мал шаруашылығына қатысты ұсыныстар ортаға салынды.
Кездесулерде көтерілген мәселелердің барлығы назарға алынып, тиісті органдарға жеткізу және бақылауға алу бағытында жұмыстар жүргізілетіні айтылды.
