Semeytany.kz – бүгін Мақаншы ауданының орталығы Мақаншы ауылында «Ауыл – ел бесігі» мемлекеттік бағдарламасы аясында 140 орындық «Інжу-Маржан» балабақшасының салтанатты ашылу рәсімі өтті.
Жаңа нысанның ашылуына облыс әкімінің орынбасары Мейірлан Раханов қатысып, аудан тұрғындарын құттықтады. Ол өз сөзінде мектепке дейінгі тәрбие мен оқытудың маңызына тоқталып, балабақшаның іске қосылуы балалардың сапалы білім алып, саналы тәрбие алуына жол ашатын нақты қадам екенін айтты. Сондай-ақ Мемлекет басшысының тапсырмасына сәйкес өңірде мектепке дейінгі білім беру ұйымдарының қолжетімділігі мен сапасын арттыру бағытында жүйелі жұмыстар жүргізіліп жатқанын атап өтті.
«Інжу-Маржан» бөбекжайы 6 топқа арналған. Балабақша заманауи талаптарға сай жабдықталып, бүлдіршіндердің жан-жақты дамуына қажетті жағдай жасалған. Қауіпсіз әрі қолайлы орта қалыптастырылған жаңа мекеме балалар үшін тәрбиенің, білім мен мейірімнің алтын ұясына айналмақ.
Балабақшаның іске қосылуы аудан бойынша мектепке дейінгі ұйымдарға кезектілікті қысқартуға және 52 жаңа жұмыс орнын ашуға мүмкіндік берді.
Салтанатты шарада аудандық ардагерлер кеңесінің төрағасы Советхан Қалиев те құттықтау сөз сөйлеп, балабақша – тәрбиенің алғашқы баспалдағы, адамгершілік пен білімнің негізі қаланатын қасиетті орда екенін айтты. Жиналған жұртшылық өңір басшылығына алғыс білдіріп, игі бастамаға жылы лебіздерін жеткізді.
