Тарбағатайда Жаңа жыл шыршасының шамы жылдағадан ерте жанды, Аудандық мәдениет үйінде балаларға арналған Жасыл шырша мерекесі желтоқсанның жиырма үшінде басталып кетті. Үш-төрт күннің ішінде тоғыз шырша мерекесі өтіп, оған аудан орталығындағы екі мектептен 400-ге жуық бала қатысып, мерекелік қуанышқа бөленді
Желтоқсанның жиырма үшінші жұлдызы күні аудандық мәдениет үйінде «Сырдария» және «Сәлем» дүкендерінің иелері, ерлі-зайыпты кәсіпкерлер Құлмағанбет пен Анар Қожахметовтар жылдағыдай жаңа жылды қарсы алу мерекесін өткізді. Оған жетім, жартылай жетім және аз қамтылған отбасыларынан шыққан 50 бала қатысты. Кәсіпкерлер әр балаға 10000 теңгенің сыйлығын тарту етті.
Желтоқсанның жиырма алтыншы жұлдызында мәдениет үйінде аудан әкімі Ділдабек Оразбаевтың қатысуымен аудандағы аз қамтылған отбасы балалары, жетім, жартылай жетім балаларға арналған шырша мерекесі өтті. Жаңа жылдық «Шырша жыры» әнімен басталған айтулы мерекеге балалар алуан түрлі үлгіде киініп келіпті. Мектеп өнерпаздары билеген “Жаңа жыл” вальсі, «Көбелектер биі», жұмбақтар жасыру, Аяз ата мен Қаршақызды қарсы алған, әр ауылдан келіп ән салып, би билеген балалардың өнері мерекені ажарландырып жіберді. Балаларды тамаша әсерге бөлеген аудандық мәдениет үйі әзірлеген «Қызыл Телпек» қойылымы да көңілден шықты. Ортадағы алып шыршаны айнала өз өнерлерін көрсеткен балаларға Аяз атаның тәттілері мен аудан әкімінің атынан сыйлықтар берілді. Аудан жасөспірімдеріне жаңа жылдық көңіл күй сыйлау, оларға ерекше мереке салтанатын өткізуде шырша мерекесінің шығармашылықпен жоғары деңгейде өтуіне №2 Ақсуат орта мектеп ұжымы (директоры Б.Көшкімбаев, тәрбие ісі жөніндегі орынбасары А.Сұлтанбекова) ұйымшылдық танытты.
Ақсуат халық театрының әртістері балалар шығармашылығына орыстың халық ертегісінің желісіндегі Мейрамғали Дәрменқұловтың «Қызыл телпек» және «Ханзада мен Ханшайым» атты ертегісінің қойылымын ұсынды. Балаларға арналған жаңа жылдық тамаша қойылымды театрдың көмекші режиссері Г.Искакова сахналады.
Аудан әкімі Ділдабек Оразбаев желтоқсанның жиырма жетісі күні Ақжар ауылына барып, М.Әуезов атындағы орта мектепте оқушылардың жаңа жылдық мерекесіне қатысты. Бұл мектептің ұжымы да (директоры Әлия Нұрахметова, тәрбие ісінің меңгерушісі Лена Жүнісбекова) жаңа жыл тойын балалар түсінігіне лайық, танымдық, тәрбиелік мақсатта қызықты етіп ұйымдастырыпты. Ән шырқап, би билеп, тақпақ айтып, жұмбақтар шешкен өнерлі балалар мұнда да Аяз ата мен қаршақыздың сыйлығына қарық болды. Әр ауылдан жиналған балаларға аудан әкімі өз қолымен сыйлықтар үлестірді. Жаңа жыл тойына арналған шаралар одан кейін де жалғасып жатты.
Хамза САТИЕВ,
«Семей таңы»
