Семей қаласында «Қаржы сақшысы (Qarjy saqshysy)» интерактивті білім беру ойынының облыстық финалының жеңімпаздары мен жүлдегерлерін марапаттау рәсімі өтті.
Аталған іс-шара Абай облысы бойынша Экономикалық тергеп-тексеру департаментінің қолдауымен, өскелең ұрпақтың қаржылық сауаттылығын және құқықтық мәдениетін арттыруға, сондай-ақ заманауи экономикалық және цифрлық қауіптерге қарсы тұрақты иммунитет қалыптастыруға бағытталған «Заң және тәртіп» бастамасы аясында ұйымдастырылды.
Облыстық финалға Абай облысының жалпы білім беретін мектептерінің 10–11-сынып оқушылары қатысты. Қатысушылар қаржылық және цифрлық қауіпсіздік саласындағы білім деңгейін, қаржылық алаяқтық схемаларын, дропперлік әрекеттерді, киберқауіптер мен өзге де тәуекелдерді анықтау және талдау қабілеттерін көрсетті.
Іс-шара барысында Абай облысы бойынша Экономикалық тергеп-тексеру департаменті басшысының орынбасары Сәкен Қондыбаев сөз сөйлеп, бағдарламаның маңыздылығына тоқталды.
– «Заң және тәртіп» нарративі аясында Абай облысы бойынша Экономикалық тергеп-тексеру департаменті «Қаржы сақшысы» интерактивті бағдарламасының қорытындысын шығарып отыр. Бағдарлама жастардың, әсіресе орта және жоғары сынып оқушыларының цифрлық және қаржылық сауаттылығын арттыру мақсатында әзірленді. Қорытынды кезеңде финалистер мен жеңімпаздар анықталды. Оқушылардың қызығушылық деңгейі жоғары, дайындық сапасы бізді ерекше қуантты. Мұндай іс-шаралар алдағы уақытта да жалғасын табады, – деді спикер.
Сайыс барысында оқушылар қаржылық тәуекелдерге, онлайн-алаяқтыққа және цифрлық ортадағы жауапты мінез-құлыққа қатысты нақты өмірлік жағдайларды модельдейтін практикалық кейстерді шешті.
Ойын қорытындысы бойынша жеңімпаздар мен жүлдегерлер дипломдармен және естелік сыйлықтармен марапатталды. Рәсім барысында интерактивті оқыту форматы оқушылардың қаржылық сауаттылығын арттырып қана қоймай, жеке қаржыға жауапкершілікпен қарау, сыни ойлау және саналы шешім қабылдау дағдыларын қалыптастыратыны атап өтілді.
«Қаржы сақшысы» ойыны Абай облысы бойынша Экономикалық тергеп-тексеру департаментінің жүйелі профилактикалық жұмысының бір бөлігі болып табылады. Жоба жастардың экономикалық құқықбұзушылықтарға тартылуының алдын алуға және қоғамда заңға бағыну мәдениетін нығайтуға бағытталған.
