Семей қалалық Достық үйінде ветеринар мамандардың семинары өтті. Жиында мамандар салаға қатысты мақсат — міндеттерді айқындап, оларды жүзеге асыру жолдарын талқылады.
{jcomments on}Семинарға ШҚО ветеринария бөлімдерінің басшылары, мемлекеттік коммуналдық кәсіпорын басшылары, Семей, Курчатов қалалары мен Абай, Бесқарағай, Жарма, Бородулиха аудандарының ветеринарлық пункт басшылары қатысты. Күн тәртібінде ШҚО ветеринария саласының бүгінгі жайы мен алға қойған міндеттері және саланы дамыту, мал шаруашылығын өркендету, төрт түлікті сақтандыру мәселелері қаралды.
Наурыз айының басында Шығыс Қазақстан облысы мәслихатының XXV кезектен тыс сессиясында облыстық әкімдікке жаңадан 4 басқарма қосылған болатын. Соның бірі — ветеринария басқармасы.
— Орталық атқару органдарынан жергілікті атқару органдарына бірқатар құқықтар мен мүмкіндіктер, 17 қызмет пен 116 бірлік, яғни маман, берілген болатын. Қаулы негізінде облысымызда ветеринария басқармасы құрылды,- дейді ШҚО ветеринария басқармасының төрағасы Нұржан Тоқсеитов.
Семинар барысында облысымызда сүтті мал шаруашылығын дамыту, сүтті — тауарлы фермаларды қайта жаңғырту және жаңадан құру, сүт қабылдау пункттерін ашу мен халықтан сүт жинау сынды істер қолға алынғаны айтылды. Семинарда мал шаруашылығында ветеринарлық — санитарлық қауіпсіздікті сақтау басты талап екені де сөз болды.
-«Нұр Отан» партиясының XVІ съезінде Мемлекет басшысы агроөнеркәсіп кешенінің бір маңызды саласы ретінде мал шаруашылығын дамыту ісіне делегаттардың назарын аударды. Ветеринарлық — санитарлық қауіпсіздіксіз мал шаруашылығының дамуын елестету мүмкін емес. Жаңа басқарма жасақталғалы, қалалар мен аудандарда ветеринарияның дербес бөлімдері құрылып жатыр. Ол құрылымдар өңіріміздің, еліміздің ветеринарлық қауіпсіздігін қадағалайтын болады. Біз ауыл шаруашылығымен айналысатын жергілікті тауар өндірушілердің мүмкіндігін ескере отырып, оларға басымдық береміз. Қазіргі таңда ветеринарлық қауіпсіздіксіз жергілікті жерде мал шаруашылығын дамыту ісі алға баспайтыны анық,- деген Нұржан Тоқсеитов мал ауруын болдырмау, оның алдын алу ветеринар мамандардың алдында тұрған басты міндет екендігін мәлімдеді. Бұл мәселе бойынша жалпы ахуал жаман емес екендігінен хабардар етті. Сондай -ақ семинарда жұмыс сапасын арттыру үшін мал басы санағын жүргізу қажеттігіне назар аударды.
Әйгерім СӘРСЕНҒАЛИ,
«Семей таңы»
