Semeytany.kz — Бүгін Абай облысының әкімі Берік Уәлидің төрағалығымен кеңейтілген аппараттық кеңес өтіп, өңірдің 2026 жылға арналған құрылыс жоспары мен облыс аумағындағы тарихи-мәдени ескерткіштердің жай-күйі және оларды қорғау шаралары талқыланды.
Жиында облыстық құрылыс басқармасының басшысы Бекжан Бапышев пен мәдениет, тілдерді дамыту және архив ісі басқармасының басшысы Жанжігіт Омархан баяндама жасады. Кеңеске облыстық басқарма басшылары, өңірлік департамент жетекшілері қатысып, аудан-қала әкімдері бейнережимде қосылды.
Ресми дерекке сүйенсек, 2025 жылдың қорытындысы бойынша құрылыс-монтаж жұмыстарының көлемі 354 млрд теңгеге жеткен. Ал 2026 жылға күтілетін көрсеткіш 379 млрд теңге болып отыр. Қазір облыста бюджет қаражаты есебінен 35 әлеуметтік нысанның құрылысы жүріп жатыр. Бұған қоса off-take келісімі аясында білім, спорт және мәдениет бағытындағы бірнеше нысан салынуда.
Семей қаласының Қарағайлы ықшам ауданында 2025 жылы 13 көпқабатты тұрғын үйдің құрылысы аяқталғаны айтылды. Сонымен бірге «Абайға құрмет» акциясы аясында 16 жобаның құжаттары әзірленіп жатыр. Олардың қатарында Достық үйі, көрме орталығы, Келешек мектебі, үстел теннисі орталығы, шығармашылық және медиа орталықтары, Ертістің сол жағалауын абаттандыру, Жекпе-жек сарайы, Рәміздер алаңы, «Анаға тағзым» кешені, мешіт, стадион, ботаникалық парк, «Абай әлемі», руханият орталығы, желілік парк және қоғамдық кеңістігі бар мәдениет үйі сияқты жобалар бар.
Аймақ басшысы салаға жауапты орынбасарына және құрылыс басқармасына қала-аудан әкімдерімен бірлесіп, салынып жатқан әлеуметтік нысандарды және off-take келісімімен іске асып жатқан жобаларды белгіленген мерзімде аяқтауды тапсырды. Сондай-ақ 2026 жылға жоспарланған тұрғын үйлерді пайдалануға беру мен әлеуметтік осал топтарға арналған жалдамалы пәтерлерді уақытылы қамтамасыз ету мәселесіне ерекше мән беруді міндеттеді.
Берік Уәлидің айтуынша, 2026 жыл өңір үшін инфрақұрылымдық даму мен құрылыс саласында жаңа белеске шығатын кезең болмақ. Негізгі мақсат – әлеуметтік-экономикалық әлеуетті арттырып, тұрғындардың өмір сапасын жақсартуға бағытталған қауіпсіз әрі қолайлы орта қалыптастыру.
