Қазақстан халқы Ассамблеясының 20 жылдығына байланысты Бегалин атындағы жалпы орта білім беретін мектептің сызу, бейнелеу, сурет пәнінің мұғалімі Е.Хасенов пен технология пәнінің мұғалімі Т.Советова қолөнер, сурет көрмесін ұйымдастырды. Көз қызықтырар көрмені ұйымдастырудағы мақсат — өскелең ұрпаққа барша ұлттар арасындағы татулықты, Қазақстан халықтарының бірлігін насихаттау, жасөспірімдерді патриотизмге тәрбиелеу.
{jcomments on}Кең залға оқушылар өздерінің қолөнер туындыларын, түрлі-түсті қарындашпен, акварельмен салған суреттерін қойып, жайнатып-ақ жіберді.
«Болар бала — бесігінен» деп түйген ғой дана халқымыз. Көрмедегі шебер қолдардан шыққан заттар, әшекейленген ою-өрнекті көрпешелер, тоқылған небір түрлі киім-кешектер, моншақпен безендірілген бұйымдар, ағаштан жасалған жабдықтар көздің жауын алады. Балалардың өз қиялымен достықты, татулықты, ел бірлігін бейнелейтін суреттерінен көп нәрсені аңғаруға болады. Көрмеде көңіл толқытар заттар аз емес. Келушілерді ғажайып шабыт үстінде жасалған дүниелер сүйсінтпей қоймады.
«Егер де мал керек болса, қолөнер үйренбек керек. Мал жұтайды, қол-өнер жұтамайды»,- деп Ұлы ақын Абай атамыз 33 — қара сөзінде тамаша айтқан ғой. Көрмеден де сондай ой түйгендейсің. Мұның бәрі мектептегі қолөнер үйірмесінің де жұмысының жемісі екені сөзсіз.
Қолөнер бұйымдарын жасауда А.Төлеуғалиева, М.Бөкейханова, А.Қонысбекова, Б.Болатова, Ә.Бүркітбаева, Ш.Манатаева, А.Мұратова, Қ.Молдағалиев, Е.Қайырбеков, Қ.Мылтықбекова, С.Мұхтаров, М.Досымханов, К.Ерғалиева, К.Аман-ғалиевалардың тақырыптық салған суреттері көзтартарлық әдемілігімен, мазмұндылығымен ерекшеленді. 2 сыныптан Ерсін Мұхтаров өзінің талабы бар кішкентай суретші екенін байқатты. Мектепте талапты оқушылар көп-ақ екен.
Қазима ҚАЖЫБЕКОВА,
«Семей таңы»
