Семей қаласында «Нұрбанк» АҚ филиалы ашылды. Салтанатты шараға Семей қаласының әкімі Айбек Кәрімов қатысты.
{jcomments on}Жаңадан ашылып отырған банк филиалы қаланың ірі кәсіпорындарына, әртүрлі ұйымдарға, шағын және орта бизнес компанияларына, жеке тұлғаларға кешенді қызмет көрсете алады. Яғни қалада жұмыс істейтін банк бөлімшесі аймақтағы шағын және орта кәсіпкерлікке несиелік және түрлі бағдарламалар арқылы көмек көрсету ісіне қатысуда. Сонымен қатар, барша қазақстандықтармен бірге Семей филиалының тұтынушыларына да «Нұрбанк» АҚ ұсынатын барлық қызмет түрлері көрсетіледі. Атап айт-қанда, интернет-банкингтен бастап дәстүрлі ақша аудару, валюта айырбастау, несие алу, депозитке салу сияқты қызметтерді пайдалануға болады.
Салтанатты шарада сөз алған қала әкімі Айбек Кәрімов банк қызметкерлері мен барша семейліктерді банк филиалының ашылуымен құттықтап, банк қызметіне сәттілік, табыс тіледі.
— Жалпы, дүниежүзілік экономикалық жүйеде банк институты экономиканың күре тамыры саналады. Өйткені бүкіл экономика осы банк жүйесімен байланысты. Әрине, банктің айналым қоры, оның қаржы салушылары, тұтынушыларының көп болғаны қала экономикасының деңгейін де көрсетеді. Екіншіден, бұл қаланың көрікті орындарының біріне айналады. Сондықтан да біз «Нұрбанк» АҚ басқармасына қаламызда талайдан бері тұрып қалған ғимаратты қайтадан қалпына келтіріп, Семейдің көрікті жерлерінің біріне айналдырып жатқанына ал-ғысымызды айтамыз. Бұл — тек банк қызметкерлерінің ғана емес, семейліктердің де қуанышы, — деді қала әкімі өз сөзінде.
Өз кезегінде «Нұрбанк» АҚ-ның Семей қаласындағы филиалының директоры Дархан Төлеген мен «Нұрбанк» АҚ-ның басқарушы директоры Талғат Шәміл сөз алып, семейліктерге, салтанатты рәсімге қатысушыларға алғыстарын жеткізіп, қолдау танытқан қала әкіміне, әріптестеріне ризашылықтарын білдірді.
— Бүгін, міне, Семей қаласында ашық-жарқын салтанатты күн. Өйткені қаламызға үлес қосып, осындай ғимаратты жөндеуден өткізіп, халқымызға жақсы қызмет көрсететін орын ашып отырмыз. Наурыз мерекесі кезінде біз де жаңа ғимаратқа көшіп отырмыз, — деді «Нұрбанк» АҚ-ның Семей қаласындағы филиалының директоры Дархан Төлеген.
Жалпы, «Нұрбанк» ақ 1992 жылы Атырау қаласында құрылған. 2003 жылы банк Алматы қаласына көшірілді. Қысқа мерзімнің ішінде «Нұрбанк» АҚ аймақтық банктен республикалық деңгейге көтеріліп, Қазақстан банктерінің алғашқы ондығында нық орнықты. Бүгінгі күні «Нұрбанк» АҚ бірқатар негізгі көрсеткіштер бойынша 8 — орында тұр. Қазіргі таңда республиканың барлық ірі аймақтарында 16 филиал, 75 әмбебап орталық банктік қызмет көрсетуде.
Асан МЫРЗАХАНОВ,
«Семей таңы»
