Таяуда Елбасы Үкіметтің кеңейтілген отырысында Қазақстан халқын отандық өнімдерді тұтынуға шақырып, сондай-ақ еліміздің барлық өңірлеріндегі сауда орындарында қазақстандық өнімдерге жеке бұрыш бөліп, басқа импорттық тауарлардың тасасында қалмауын қадағалауды жергілікті билікке қадап тапсырған болатын.
{jcomments on}Отандық тауар өндірушілерді қолдау бойынша аудан әкімдігі жанынан арнайы жұмыс тобы құрылды. Бүгінде аудандық жұмыс тобы өңірдегі бірқатар сауда нысандарын аралап, жергілікті тауар өндірушілерге ыңғайлы да көзге бірден шалынатын жерден орындар бөлінуіне көңіл бөлді. Сауда орындарындағы сөрелердегі өнімдер тұтынушыны бірден өзіне тартады. Олардың тауарлары «Қазақстанда жасалған» деген төрт бұрышты маңдайша жазумен белгіленген. Сондай-ақ жергілікті тауар өндірушілердің өнімдерінің молдығы да сүйсінтеді. Басым көпшілігі — түрлі сүт өнімдерімен қатар, шұжық және балық өнімдері.
— Бүгінгі таңда барлық сауда орындарында жергілікті тауар өндірушілерге арнайы орындар бөлінді. Тұтынушылар әр өнімнің сапасына мән береді. Бұл талапқа отандық өнімдер толық сай келетіндіктен, жергілікті өнімге сұраныс жоғары. Оның ішінде ет, сүт, жұмыртқа, көкөніс, ұн, макарон және кондитер бұйымдары сұранысқа ие, — дейді аудандық кәсіпкерлік бөлімі басшысының міндетін атқарушы Мақсат Қасымов.
— Мен азық — түлік алғанда, негізінен, жергілікті өнімдерді алуға тырысамын. Соңғы кездері «Қазақстанда жасалған» деген акция өткізіліп, өз өнімдерімізге басымдық беріліп жатқанын құптарлық іс деп білемін. Алыс — жақын шетелдерден келетін азық-түлік өзіміздікіне жетпейді. Ұзақ сақталуы үшін, оларға әртүрлі қоспалар қосылады. Жергілікті жерде өндірілген азық — түліктің сапасы да, дәмі де, жұғымдылығы да олардан жоғары, — дейді Ләззат Қасымова есімді тұтынушы.
Айта кетерлігі, тұрғындарды сапалы әрі тиімді бағада азық-түлікпен қамтамасыз ету мақсатында жергілікті тауар өндірушілердің қатысуымен халық көп шоғырланған елдімекендерде ауылшаруашылық жәрмеңкелерінің өткізіліп келе жатуы да — тауар өндірушілер үшін көп қолдау. Дәстүрлі іске аудан халқы да қалыптасып, базарлығы мол жәрмеңкені асыға күтетіні де жасырын емес.
Мейірхан ОСПАНБАЕВ,
Жарма ауданы.
