Өткен жұма күні Тарбағатай ауданының орталығы Ақсуат ауылындағы Мәдениет үйіне «Қазақстанның үздік тауарлары – 2015» аудандық көрме — конкурсы өтті. Көрменің ашылу салтанатында Тарбағатай ауданының әкімі Д. Оразбаев құттықтау сөз сөйледі. Ділдабек Тәжібайұлы Елбасының тапсырмасы бойынша шағын және орта бизнесті қолдап, отандық тауар өндірушілерді ынталандыру, олардың шеберлігін шыңдау, тәжірибе алмасуын ұйымдастыру мақсатында өткізіліп отырған бұл байқаудың маңызын, аудан экономикасын дамытуда кәсіпкерлердің де үлесі зор екенін, «Қазақстанда жасалған» республикалық акциясына орай, аудан халқын жергілікті тауарлармен қамтамасыз етуде маңызды қадамдар жасалып отырғанын атап көрсетті. Айтулы шараның еліміздің саяси өміріндегі маңызды кезең ҚР Президентінің сайлауы қарсаңында өтіп отырғанын еске салған аудан әкімі көрмеге қатысушыларды алдағы сайлау күні белсенділік танытуға шақырды.
{jcomments on}Байқаудың нәтижесі бойынша ұлттық тағам өндіру шебері, ұлттық қолөнер майталманы, ауыл шаруашылығының озық тауарын өндіруші, өнеркәсіп өнімдерінің озық тауарын шығарушы сияқты жеңімпаздар анықталып, марапатталды. Үздіктер қатарында А.Серікова, К.Оралбаева, А.Жақыпжанов, Г.Нұғыманова, Меллетхан Сахаба, Е. Кенжебаев, Б. Закарина, Қуанған Тыңай, Т.Кітатов, Б.Егінбаев, Е.Қожақаев, А.Қондықбаева, Е.Оспанов және басқалардың есімдері мақтанышпен аталды. Көрме-конкурсқа қатысушыларды «Тарбағатай кәсіпкерлері» қоғамдық бірлестігінің төрайымы Манат қажы Әлімжанова құттықтады.
Хамза СӘТИЕВ,
«Семей таңы»
