Зайсан өңірінде тұрғындарды газбен қамтамасыз ету жұмыстары жүйелі түрде жүргізілуде. Зайсан аудандық сәулет, кұрылыс, тұрғын үй-коммуналдық шаруашылық, жолаушы көлігі және автомобиль жолдары бөлімінің басшысы А.Утебаевтың мәліметіне сүйенсек, Зайсан қаласының қалалық газдандыру желісін салу бойынша бірінші кезеңнің алғашқы іске қосу кешені бойынша Қазақстанның газ таратушы әрі жабдықтаушы ірі компаниясы «КазТрансГаз Аймақ» АҚ-ның 405 млн. теңге қаржысына жоба дайындалып, 2013 жылы оның 200 млн. теңгесі игеріліп, 18,5 шақырым газ кұбыры тартылса, қалған 205 млн. теңгеге өткен жылы 19,75 шақырым газ құбыры тартылған екен.
{jcomments on}Айта кету керек, «КазТрансГаз — Аймақ» АҚ-ның негізгі міндеттері газды жеткізуді, таратушы желілер бойынша көгілдір отынды тасымалдауды, аймақтарға газ тасымалдау активтерін басқаруды ұйымдастыру болса, қызметтің басты бағыты ел-дімекендерге, коммуналдық — тұрмыстық және өнеркәсіптік кәсіпорындарды газбен апатсыз және үздіксіз қамтамасыз ету болып табылады.
Жалпы, Зайсан қаласын толығымен газдандыру желісін салу бойынша бірінші кезеңнің екінші іске косу кешенінің жобалық сметалық құжаты жасалынған. Оның жалпы құны 1,067 млрд. теңгені құрайды екен. Ал биылғы жылға 270 млн. теңге бөлінген.
Бұл тұрғыда атқарылған жұмыстардың нәтижесінде бүгінде 248 үй, 30 коммерциялық нысан және Әуезов мектебі газға қосылды. Сондай-ақ Мұстафина (58 996,0 мың теңге) және Ломоносов (38 809,634 мың теңге) мектептерінің жылу қазандықтарын газға ауыстыруға байланысты жобалық сметалық құжат әзірленіп, биыл қос білім ошағына қаражат бөлінді.
Ал «Тарбағатай-Мұнай» ЖШС 195,04 млн. теңге қаржыға магистралды каналдан қала шетіндегі газ тарату пунктіне дейін кұбыр төсеп, АГРС, ГРП және қосалқы құрылыстарын салды. Сонымен қатар «Тарбағатай — Мұнай» ЖШС қаржысы есебінен 9 ауылға, яғни Қарабұлақ, Кеңсай, Қайнар, Айнабұлак, Жамбыл, Көгедай, Шалқар, Қаратал, Үлкен Қаратал елдімекендеріне тарататын құны 791,6 млн. теңгеге құбыр тартудың жобасы жасалынып, газ тартатын қондырғы орнатылған.
Аталмыш елдімекендердің ішін газдандыруға байланысты ЖСҚ жасалынып, мемлекеттік сараптама қорытындысы алынды. Жалпы құны — 1 млрд. 276 млн. теңге. Өткен жылы облыстық бюджеттен 15 млн. теңге бөлініп, Қаратал ауылында газ құбырын тарту жұмыстары жүргізілген болатын. Бұл игілікті іс биыл да жалғасын тауып, республикалық бюджеттен 470 млн. теңге қаржы бөлініп, жүйелі жұмыстар жүргізіледі деп жоспарлануда.
Зайсан аудандық сәулет, кұрылыс, тұрғын үй-коммуналдық шаруашылық,
жолаушы көлігі және автомобиль жолдары бөлімі мәліметі негізінде әзірлеген
Нұрдәулет КӘКІШЕВ.
