Семей қаласындағы Ядролық медицина және онкология орталығына жақында компьютерлік томограф және цифрлық рентгендік маммографиялық аппараты келді. Бүгін облыс әкімі Берік Уәли медициналық нысандағы жоғары технологиялы заманауи қондырғылардың жұмысымен танысты.
Медициналық жабдықтар орталықтың өз қаражаты және 2023-2027 жылдарға арналған онкологиялық аурулармен күрес жөніндегі кешенді жоспар аясында республикалық бюджет есебінен сатып алынды. Аталған жоба шеңберінде клиникалық зертханаларға, емханалық бөлімге, хирургия, анестезиология, реанимация және қарқынды терапия бөлімшелеріне, сондай-ақ, басқа да құрылымдық бөлімдерге шамамен 50 түрлі медициналық құрал-жабдық сатып алынды. Бұл кешенді тәсіл онкологиялық ауруларды диагностикалау мен емдеудің толық циклін заманауи медициналық технологиялар арқылы жоғары деңгейде қамтамасыз етуге мүмкіндік береді.
Ядролық медицина және онкология орталығының директоры Саят Таңатаров аймақ басшысына заманауи жабдықтардың мүмкіндіктері және орталықтың қызметі, алдағы даму жоспарлары туралы баяндады.
Жақында іске қосуға жоспарланып отырған жабдықтардың қатарында сәулелік диагностика бөлімінде орнатылған «Revolution Maxima» компьютерлік томографы және «GIOTTO CLASS 40000» цифрлық рентгендік маммографиялық аппараты бар. Бұл жүйелерді іске қосу орталықтың диагностикалық мүмкіндіктерін едәуір кеңейтіп, ауруларды ерте кезеңде анықтауға мүмкіндік береді. «Revolution Maxima» компьютерлік томографы жоғары сканерлеу жылдамдығымен, кескін сапасының айқындығымен және сәулелік жүктеменің төмендігімен ерекшеленеді. «GIOTTO CLASS 40000» цифрлық маммографиялық аппараты сүт бездерін жоғары дәлдікпен зерттеуге арналған және диагностика саласындағы заманауи халықаралық стандарттарға сәйкес келеді.
Орталықтың негізгі ғимараты 1978 жылы салынған. Құрамында 85 төсек-орынға арналған стационар және екі қосалқы ғимарат бар. Сонымен қатар емхана, радиологиялық орталық және радиология бөлімі жұмыс істейді. Қазіргі таңда мұнда 575 адам еңбек етеді. Бүгінде орталық облыстың 600 мыңнан астам тұрғынына қызмет көрсетеді.
Аймақ басшысы жаңа медициналық қондырғылардың жұмысын көріп, орталық қызметкерлерімен пікірлесті.
«Ядролық медицина және онкология орталығы – облыстағы ең ірі медициналық мекемелердің бірі. Орнатылған жаңа заманауи жабдықтар медициналық қызметтің сапасын арттыруға мүмкіндік береді. Мұндай жоғары технологиялық қондырғылар дәрігерлер үшін де, емделушілер үшін де аса қажет. Олар ауруларды ерте кезеңде анықтауға, дәл диагноз қоюға және тиімді ем жүргізуге жол ашады», – деді облыс әкімі.
Жалпы, 2025 жылы облыстың денсаулық сақтау саласының материалдық-техникалық базасын жаңғыртуға 6 жарым миллиард теңгеден астам қаржы бөлінді. 2026-2028 жылдар аралығында стационарлық және амбулаториялық-емханалық көмек көрсететін ұйымдар үшін 481 медициналық техника сатып алу жоспарлануда. Бұл медициналық техникамен қамтылу деңгейін 95 пайызға дейін жеткізуге, тозу деңгейін 30 пайызға дейін төмендетуге мүмкіндік береді.
