Семей қалалық әкімдігінде құқық бұзушылықтың алдын алу жөніндегі ведомствоаралық комиссияның кезекті отырысы өтті. Қала әкімі Айбек Кәрімовтің төрағалық етуімен өткен жиынға комиссияға мүше мемлекеттік органдардың жетекшілері қатысты. Отырыстың күн тәртібінде Семей өңіріндегі нашақорлықтың алдын алу бойынша қабылданып жат-қан шаралар туралы, ішкі саясат бөлімінің азаматтық қоғаммен және үкіметтік емес ұйымдармен сыбайлас жемқорлыққа қарсы іс-қимыл тұрғысындағы әрекеттестігі туралы мәселелер қарастырылды.
{jcomments on}Жиын барысында бірінші сұрақ бойынша Семей қаласы Ішкі істер басқармасы басшысының орынбасары Ақылхан Қас-қабаев баяндама жасады. Өз сөзінде ол есірткі айналымына байланысты қылмыстардың алдын алу мақсатында өткізілген жедел алдын алу шаралары туралы айтты. Былтыр республикалық, облыстық, қалалық деңгейдегі арнайы акциялар ұйымдастырылған көрінеді.
— Өткен жылы заңсыз есірткі айналымы бойынша 93 қылмыс анықталып, тіркелген. Оның ішінде 83-і есірткі заттарын заңсыз сатуға қатысты болса, 9-ы есірткі заттарын сақтау фактісі. Сондай-ақ нашақорлар притонын ұстау қылмысы да анықталған.
Заңсыз айналымнан қырық алты келіден астам есірткі тәркіленді. Қазіргі таңда нашақор ретінде екі жүз он бес адам тіркеуде тұр,- деді Семей қаласы Ішкі істер басқармасы басшысының орынбасары. Сондай-ақ Ақылхан Төлеуханұлы өз сөзінде нашақорлықпен күресте, құқық қорғау органдарымен қатар, қоғам да белсенділік таныту керектігін айтып өтті.
Баяндаманы тыңдай келе қала әкімі Айбек Кәрімов заңсыз есірткі айналымы мен нашақорлықтың алдын алу бағытындағы шаруаларға салғырт қарауға, қол жеткізілген нәтижелерге тоқмейілсуге болмайтынын, алдағы уақытта бұл тұрғыдағы жұмыс сапасын жетілдіре түсуге көңіл бөлу қажеттігін тілге тиек етті.
Семей өңіріндегі нашақорлықтың алдын алу мәселесі бойынша қалалық наркологиялық диспансердің директоры Павел Брыжахин сөз алды. Баяндамасында ол өзі басқарып отырған мекеменің жұмысы жайлы айтып өтті. Павел Брыжахин өткен жылы есірткі заттары мен психотроптық заттарды тұтынуға байланысты туындайтын тәуелділік бойынша көрсеткіш 2013 жылғымен салыстырғанда екі еседен астамға төмендеп, қырық мың тұрғынға шаққанда 59 адамды құрағанына тоқталды.
— Есірткі тұтынушылардың арасында он төрт жасқа толмаған жасөспірімдер жоқ. Он бес пен он жеті жас аралығындағы балалардың саны 0,4 пайызды құрайды. Он сегіз бен отыз жасқа дейінгі жастар — 37,3 пайыз. Отыз бірден асқандардың санының үлесі 62,3 пайызды құрап отыр. Жалпы алғанда, ресми тіркелген сырқаттардың жүз мың тұрғынға шаққандағы саны 2013 жылмен салыстырғанда 242,7-ден 2014 жылы 195,1-ге дейін төмендеп, 678-ді құрады,- деді қалалық наркологиялық диспансер директоры.
Сондай-ақ жиын барысында ішкі саясат бөлімінің азаматтық қоғаммен және үкіметтік емес ұйымдармен сыбайлас жемқорлыққа қарсы іс-қимыл тұрғысындағы әрекеттестігі туралы мәселе қарастырылды. Бұл ретте жауапты сала басшысы Айдар Садырбаев баяндама жасап, атқарылған жұмыстар жөнінде мағлұматтар берді. Жиын соңында комиссия мүшелері талқыланған мәселелер бойынша жүзеге асырылуға тиіс шаруаларға қатысты бірқатар ұсыныстарын айтты.
Мирас ҚҰСАЙЫН,
«Семей таңы»
