Өткен жұмада Семей қаласының әкімі Айбек Кәрімов дзюдо күресінен үздік нәтижелер көрсетіп жүрген қаламыздың саңлақтары мен жаттықтырушыларын қабылдады. Кездесуге талай тартысты сайыстарда топ жарған Дастан Ықыбаев, Еркебұлан Қосаев және Серіктай Закетаев сынды бозкілем шеберлері мен олардың бапкерлері қатысты.
{jcomments on}Кездесуде спортшыларды халықаралық аренада ел үмітін ақтап, толағай табысқа жеткен жетістіктерімен құттықтаған қала әкімі Айбек Кәрімов алдағы уақыттарда да жоғары нәтижелерге жетулеріне тілектестік білдірді.
— Спорт – ұлттың мақтанышы. Әсіресе олимпиадалық бағдарламаға кірген спорт түрлері ұлттың мәртебесін ерекше көтереді. Соның ішінде дзюдо күресі — әлемдегі ең бір дамып келе жатқан күрес түрі. Дзюдо — үлкен дәстүрі бар күрес. Сондықтан да бұл күресті өздерің қазаққа танытып және қазақты бүкіл әлемге танытасыңдар. Сендердің жеткен жетістіктеріңе, бағындырған биіктеріңе өте ризамын, — деді Айбек Мүталапханұлы — Сендер тек Семей жұртын ғана емес, бүкіл қазақ елінің атын әлемге шығарып жүрсіңдер. Біз сендерді өзіміздің мақтанышымыз деп білеміз. Өздеріңе әрқашан да мықты денсаулық, қажымас қайрат тілеймін.
Дзюдо күресінен талай додаларда топ жарып, ел намысын қорғап жүрген спортшылар өз кезектерінде ыстық ықылас танытқан Айбек Мүталапханұлына алғыстарын жеткізіп, алдағы халықаралық деңгейде өтетін сайыстарда қаланың және ел намысын абыроймен қорғауға бар күш-жігерлерін салуға уәде берді. Бұл ретте қала әкімі спортшыларды дайындайтын бапкерлердің де елеулі еңбегін атап өтіп, оларға да нәтижелі жұмыс жасауға тілектестік білдірді.
— Бапкердің жұмысы да оңай емес. Олардың жұмысы тек сендер жеңіске жеткенде ғана көрінеді. Қалған уақытта бұл азаматтардың күнделікті еңбектерін екінің бірі біле бермейді. Сендерді жаттықтырып жүрген бапкерлеріңнің ойлаған ойлары түгел жүзеге ассын. Еңбектеріңіз жемісті болсын, — деді қала басшысы.
Басқосуда жаттықтырушылар Таныс Халелов пен Асқар Арқабаев спортшыларға ерекше көңіл бөліп отырған қала әкіміне ризашылықтарын білдірді. Сондай-ақ алдағы дүбірлі додаларда биік белестерді бағындыруға уәде берді. Өз сөзінде шаһар басшысы, спортшыларға жағдай жасалғанда ғана, жақсы нәтижелерге қол жеткізуге болатынын, Семей қаласы дарынды жастар орталығы екенін, сондықтан да спортты насихаттауды мықтап қолға алу керектігін атап өтті. Спортшылар болса ердің ерлігі сыналып, елдің елдігі таразыға түскен шақта, намысты қолдан бермеспіз деп тарасты.
Асан МЫРЗАХАНОВ,
«Семей таңы»
