Бүгінгі таңда елімізде дене шынықтыру мен бұқаралық спорт саласына баса назар аударылуда. Халық арасында салауатты өмір салтын қалыптастыру кеңінен жолға қойылып, бұл бағыттағы мәселелер мемлекеттің ерекше қамқорлығына алынған. Қазақстанның даму стратегиясында да спортты дамытуға айрықша басымдық берілгені белгілі.
{jcomments on}Соңғы жылдары, республикамыздың өзге өңірлеріндегі тәрізді, аймағымызда да бірқатар дене шынықтыру-сауықтыру кешендері, спорт алаңдары мен ареналар, хоккей қораптары мен футбол алаңдары пайда болды. Біздің қаламыз да бұл игіліктен шет қалған жоқ. Осыған дейінгі аралықта Семей футболының жүз жылдығына орай “Спартак” стадионы күрделі жөндеуден өтті, жаңадан дене шынықтыру-сауықтыру кешені, түрлі спорт залдары мен шағын футболға арналған жасанды алаңдар, жаттығу орындары ашылды. Жастарымыз өз денсаулықтарын нығайтуға ерекше ден қоюда. Олардың спортпен шұғылдануы үшін, барынша қолайлы жағдай жасалуда. Бұдан бөлек, бокс, күрес, шығыс жекпе-жегі және өзге де спорттық үйірмелер жоспарлы түрде жұмыс жасап келеді. Спорт саласына келгенде түрлі ұйымдар да белсенділік танытуда.
Жуырда елімізде салауатты өмір салтын қалыптастыру мен “Саламатты Қазақстан” мемлекеттік бағдарламасын насихаттау мақсатында “Жас Отан” жастар қанаты мен Семей қаласының ММУ студенттері “Жас Отан” — дені сау Қазақстан үшін!” атты акция ұйымдастырды. Осы орайда пікір білдірген “Жас Отан” ЖҚ хатшысы Әбділдәбек Тұрсынов қала жастары арасындағы белсенділіктің артып келе жатқанын айтады.
– Қазіргі күні шаһарымыздағы ЖОО мен колледждердің жүз елуден аса студенті Жастар мен балалардың шығармашылық сарайында дене шынықтыру жаттығуларына қатысуда. Біз денеге сергектік пен күш-қуат жинап, жастардың көңілін өздерінің денсаулықтарын нығайтуға аударуға бағытталған мемлекеттік бағдарламаларға баса назар аударамыз, — дейді ол.
Осынау шара соңы би мен спорттық өнерлер көрсетілген концерттік бағдарламаға ұласты. Кеш жүргізушілері спорттық жаттығулар мен дұрыс тамақтанудың адам денсаулығына пайдасы жайында әңгімелеп берді.
Жастардың бұл бастамасы көңіл қуантады. Расында, еліміздің спорт саласына көңіл бөлуі мемлекеттік басқару саясатының оң нәтижесі екені анық. Ендеше, оның алдағы уақытта да тұрақты жүзеге асуы тиіс. Ал бұл орайда алдағы сәуір айының 26 күні өтетін Қазақстан Республикасы Президентінің кезектен тыс сайлауы аса маңызды болып тұр. Бұл ретте семейлік жастар бұл саяси науқанға қатысуда да сергектік танытып, бір кісідей дауыс беруге қатысатындарын айтады.
Шынар РЫСАКОВА.
