Елдігіміздің алғашқы іргетасы болған Қазақ хандығының 550 жылдық мерекесіне орай Семей қаласында да іргелі шаралар ұйымдастырылуда. Әсіресе өскелең буын арасында елжандылық пен ерік — жігерді шыңдайтын түрлі спорттық сайыстар өткізу игілікті дәстүрге айналды.
{jcomments on}Аптаның сәрсенбісінде қаламыздағы балалар мен жасөспірімдердің спорт мектебінде 2003 — 2004 жылы туған өрендер арасында спорттың бокс түрінен қалалық біріншілік жалауын көтерді. Сайыста аймағымыздың әр ауданынан келген 100-ден аса балғындар өзара қолғап түйістіріп, шеберлік байқасты. Жанкүйерлер қатарында шаһардағы спорт мектептерінің шәкірттері, қатысушылардың ата-аналары, жалпы, боксты сүйетін қалалықтар мол жиналды.
Бәсеке барысында Семей қаласынан үш команданың өрендері өнер көрсетті.
Жарыс жолына алдымен кіші топ арасындағы 28-ден 42 келіге дейінгі аралықтағы боксшылар шықты. Әр ауданның үкілеп әкелген жас спортшылары алғашқы жұптық кездесуде-ақ қарқынды қимыл танытып, ұпай еселеуге тырысты.
— Бұл жарысты ұйымдастырудағы мақсат – мектеп оқушылары арасында салауатты өмір салтын насихаттай отырып, жігерлілікке тәрбие- леу, құрыштай шыныққан спортшы жастарды қалыптастырып, Қазақ хандығының 550 жылдығына орай, кешегі өткен батыр бабалардың ерліктерін дәріптеу. Шаһар төріндегі шаршы алаңға шыққан балалардың көпшілігі мұндай ірі көлемдегі сайыста алғаш рет кездесу өткізіп отыр. Зор тәжірибе жинайды. Дегенмен қимыл-қозғалыстарының ширақтығы, жеңіске деген құлшынысы қазірдің өзінде көз сүйсіндіреді. Аймағымызда боксқа қызығатын талапты өрендердің қатары көп екен, — дейді шәкірттерін баптап әкелген семейлік жаттықтырушы Ерік Әнуаров.
Байрақты бәсеке үш күнге созылмақ. Аптаның жұма күні ақтық финал өтеді. Әзірге Семей, Жарма және аягөздік балғындар қарсыластарынан ұпай санымен басым түсіп, сайыс жолын жалғастыруда. Сондай-ақ Абай, Ұлан және Бородулиха аудандарындағы спорт мектептері жасөспірімдерінің де қарқыны жоғары.
Қалалық біріншілік жеңімпаздары облыстық чемпионатқа жол тартпақ. Ал Өскемен төріндегі байқауда бағы жанған өрендер алдағы уақытта Қазақстан чемпионатына қатысуға жолдама алатын болады.
Қуаныш ЖОЛЫМБЕТ,
«Семей таңы»
