2026 жылғы 1 қаңтардан бастап Қазақстан Республикасында қосылған құн салығының (ҚҚС) мөлшерлемесі 16 пайыз болып белгіленеді. Бұл туралы Өңірлік коммуникациялар қызметі алаңында өткен баспасөз мәслихатында түсіндіру жұмысы және байланыс орталығы басқармасының басшысы Асем Тұрлыбекова хабарлады.
Оның айтуынша, ҚҚС бойынша міндетті тіркеу шегі 20 000 АЕК-тен 10 000 АЕК-ке дейін төмендетіледі. Бұл шара бизнесті жасанды бөлшектеудің алдын алып, нарықтағы барлық қатысушы үшін тең жағдай қалыптастыруға бағытталған.
Сонымен қатар жаңа Салық кодексіне сәйкес дәрілік заттар мен медициналық қызметтерге төмендетілген ҚҚС мөлшерлемелері енгізіледі. Атап айтқанда, 2026 жылдан бастап – 5 пайыз, ал 2027 жылдан бастап – 10 пайыз мөлшерлеме қолданылады. Отандық мерзімді баспа басылымдары үшін ҚҚС 10 пайыз деңгейінде белгіленеді.
ҚҚС төлеуші ретінде тіркеу тәртібіне де нақты өзгерістер енгізіледі. Бұл жөнінде Жанама салықтарды әкімшілендіру басқармасының басшысы Байсалбай Айдос түсіндірді. Оның мәлімдеуінше, ҚҚС бойынша тіркеу ерікті, міндетті немесе шартты тәртіпте жүзеге асырылады.
– Сондай-ақ ауыл шаруашылығы тауарын өндіруші заңды тұлғалар үшін есепке жатқызылатын ҚҚС-тың қосымша сомасы 70 пайыздан 80 пайызға дейін ұлғайтылды. Бұл отандық өнімнің бәсекеге қабілеттілігін арттыруға бағытталған, – деді спикер.
ҚҚС бойынша есептен шығару тек жалпыға бірдей салық режимінен арнаулы салық режиміне көшкен жағдайда немесе қызмет тоқтатылған кезде жүзеге асырылады.
Жалпы алғанда, өзгерістер салықтық әкімшілендіруді жетілдіруге, ашықтықты арттыруға және кәсіпкерлік субъектілері үшін қолайлы жағдай қалыптастыруға бағытталған
