Сәрсенбі күні «Қазпочта» акционерлік қоғамы Семей қалалық филиалының бас ғимаратында «Нұрлы жол – болашаққа бастар жол» атты Елбасы Жолдауын түсіндіруге арналған басқосу өтті. Жиынға «Мәңгілік Ел» тәрбие — білім беру орталығының директоры Рафаэль Дәуітбаев, қала әкімдігінің өкілдері, пошта қызметкерлері қатысты. Кездесу барысында стратегиялық құжаттың ел экономикасын алдағы уақытта дамыту үшін қажетті бағдар берудегі мән — маңызы мен басты бағыттары туралы айтылды.
{jcomments on}«Нұрлы жол – болашаққа бастар жол» атты Жолдаудың негізгі мақсаты еліміздегі ішкі саяси тұрақтылықты сақтап, нығайту болып табылатыны айтылған. Жиында аталмыш стратегиялық құжаттың мән — мазмұны жайлы толыққанды мағлұматқа қанығудың зор мәнге ие екендігі де сөз болды. Осы ретте кездесуге қатысушыларға өңірімізде арнайы ақпараттық — насихат топтары құрылып, Жолдауды түсіндіру жұмыстары жүргізіліп жатқаны айтылды.
Жиын барысында бірінші болып сөз кезегін алған «Мәңгілік Ел» тәрбие — білім беру орталығының директоры Рафаэль Дәуітбаев «Нұрлы жол – болашаққа бастар жол» атты Жолдаудың жариялануы дер кезінде қабылданған еліміздің бүгіні мен ертеңі үшін үлкен мәні бар шешім деп білетінін тілге тиек етті. Стратегиялық құжаттың қазіргі таңда туындап отырған жаһандық қауіп-қатерлерге берілген лайықты жауап екенін атап өтті. Сондай-ақ «Нұрлы жол» Жаңа Экономикалық Саясат бағдарламасы жаһандық қаржылық дағдарыстың теріс ықпалының деңгейін төмендетуге негіз болатын нақты шараларға құрылған бірегей жоспар екенін де жеткізді.
— Жолдаудың басында біздің еліміздің әлемдік аренадағы геосаяси үдерістер орын алып жатқан аймақта тұрғаны, мұның тигізер әсері туралы айтылған. Осы ахуалдың ықпалынан мұнай бағасының арзандауы қиындықтар тудыруы мүмкін екені ескерілген. Қалыптасқан жағдай жаңа экономикалық бағдарламаны әзірлеп, жариялауға түрткі болды. Әлемдік дағдарысқа қарамастан, елімізде инфрақұрылымды жаңғырту, әлеуметтік саясат аясында өзге де маңызды міндеттерді атқару туралы тапсырманың берілуі — көңіл қуантарлық жайт. Осының өзі Қазақстанның әлемдік қаржылық жүйеде туындаған қиындықтың қай-қайсысын болмасын еркін еңсеруге мүмкіндігі мен әлеуеті толық жетіп тұр дегенді білдіреді,- деді «Мәңгілік Ел» тәрбие-білім беру орталығының директоры. Сондай-ақ ол дүниежүзі экономикасы бетпе-бет келіп отырған қауіп-қатерлерден кідірмей өтуге еліміздің Тәуелсіздік алған уақыттан бері жинаған ұлттық қордағы қаражат септігін тигізіп жатқанын да атап өтті.
«Нұрлы жол – болашаққа бастар жол» атты Жолдаудың мән-маңызы жайлы айта келе, Рафаэль Дәуіт-баев еліміздің дамуына серпін берерлік мүмкіндіктер пайда болғандығын және оларды тез арада кәдеге жарату қажеттігіне тоқталды. Ең бастысы, барлық азаматтардың өздерінің белсенділігін арттырып, стратегиялық құжаттағы мақсат-міндеттердің нәтижелі жүзеге асырылуына атсалысуы үлкен мәнге ие екенін сөз етті. Басқосу соңында ойын түйіндей отырып, «Мәңгілік Ел» тәрбие-білім беру орталығының директоры жиналған қауымды алда келе жатқан саяси науқан – кезектен тыс Президент сайлауына белсенді түрде қатысып, дауыс беруге шақырды.
Мирас ҚҰСАЙЫН,
«Семей таңы»
