Жыл сайынғы дәстүр бойынша аудан әкімінің жаңа жылдық шыршалары ауданның шалғай ауылдарында жалғасын тапты. Аудан басшысы Д. Мусин Қарағандыкөл, Егінбұлақ және Қарғалы ауылдарында тұрғындарға арналған мерекеге қатысты. Бүкілхалықтық думанда аудандық ардагерлер кеңесінің төрағасы А.Әбенов, мәслихат хатшысы Р.Беспаев, Биғаш ауылдық округінің депутаты Б.Рахимов жергілікті тұрғындармен жүздесті.
Жаңа жылдық думан Көкжайық ауылдық округіне қарайтын Қарағандыкөл ауылынан басталды.
— Бірінші кезекте, бүгін кішкентай бүлдіршіндердің мерекесі. Олардың кіршіксіз көңілдері бұл күні ғажайыптың боларына сенеді. Періштелердің тілегі қашан да орындалады. Бұл күн тіршіліктің барлық иелеріне жаңа үміт, қуаныш, ерекше махаббат сыйлайды. Мерекелік кештің қуанышқа толы көңілді сәттері жыл бойына әрбір шаңырақта сақталсын! – деді Дүйсенғазы Мағауяұлы тұрғындарға арналған құттықтау сөзінде.
Егінбұлақ ауылында 20-ға жуық адам тұрады. Халық саны аз болғанымен, мерекелік шара өте жоғары дәрежеде өтті. Ауылдық клуб үйінің төріне қазақы салт бойынша мол дастархан жайылды. Аудан әкімі мен сыйлы қонақтарды ауыл халқы салт-дәстүр жолымен шашу шаша отырып қарсы алды.
— Ауыл – алтын бесік. Ауылдың көлемі үлкен бе, кіші ме, біз барлық елдімекенді аралап, әрқайсысына жіті назар бөлуге тырысудамыз. Міне, сол мақсатты көздей отырып, сіздердің ауылдарыңызға да келіп қалдық. Жаңа жылдарыңыз құтты болсын! Басты кәсіптеріңіз мал шаруашылығы болғандықтан, малдарыңыздың басы өсе берсін, табыстарыңыз ассын!, — деді Дүйсенғазы Мағауяұлы. Сонымен қатар, аудан әкімі Егінбұлақ ауылында еңбексүйгіштігімен көзге түскен Талғат Қырықбаев, Гүлжәкіш Сәрсенбаева, Гүлмайраш Олжабаева, Ерболат Чукеев сынды азаматтарға Алғыс хаттар табыс етті.
Қарғалы ауылындағы кеш те өзіндік ерекшелігімен өтті. Барлық ауыл тұрғындары бірі қалмай қатысқан шара барысында аудан әкімі Д.Мусин жұртшылықты жаңа жылмен құттықтап, Қарғалы ауылының дамуына елеулі үлес қосып жүрген Алтын Сейілханова, Ойрат Фазылов, Мират Манабаевты алғыс хаттармен марапаттады. Сондай-ақ, мерекелік шараларда ауыл халқының қуанышына ортақтаса келген ардагерлер кеңесінің төрағасы Атымтай Әбенов, мәслихат хатшысы Рәмзи Беспаев, аудандық мәслихат депутаты Бақыт Ғазизұлы жұртшылықты жаңа жылмен құттықтай келе, өздерінің жылы лебіздерін білдірді.
Дархан БЕРДІБЕК
