Өткен жылдың соңғы күндері зайсандықтар үшін мән-маңызы зор мәдени шараларға толы болды. Атап айтар болсақ, солардың бірі ретінде қылықты қыз, ибалы аруларымыз сынға түскен ерекше сайыс ұйымдастырылды.
Зайсан аудандық мәдениет үйінде өткен «Зайсан аруы-2013» байқауына қатысқан үміткерлер саны көп болды. Сол себепті де, сайыс тартысты да, қызықты өрбіді. Қатысушылардың барлығы да өнерлерін бір кісідей ортаға салып, сайыс талаптарынан шыға білді.
Айта кетер болсақ, қатысушылар арасында Айкерім Баженованың, Жұлдыз Ерболқызының, Гүлдана Ескендірованың, Айгүл Хамитқызының, Арайлым Рысбекованың қазақи сәнмен әдемі үйлесім тауып тігілген көйлектері көз тартып, даярлықтарының жоғары екендіктерін байқатты. Сайыскерлер жергілікті ақындардың өлеңдерін мәнерлеп оқыды.
Гүлдана Ескендірова аядай ғана шағын ауыл Жамбылдан түлеп ұшқан, республикамызға танымал ақындар Нұрлан Мәукенұлы мен Гүлнәр Салықбаеваның өлеңдерін нақышына келтіре оқып берді. Ал Жұлдыз Ерболқызы жерлес ақынымыз, «Қазақстанның еңбек сіңірген қайраткері», есімі республикамыз-ға танымал шығармашылық иесі Ұлықбек Есдәулетовтің «Көтер басты…» атты өлеңін оқыды.
Сонымен қатар, Арайлым Рысбекова, Меделхан Қасенова мен Қадылбек Жағыпаровтың өлеңдері де тыңдарманның құлақ құрышын қандырды. Мәдина Алақбаеваның да талабы мен таланты көпшілік алдында көрініс тапты. Ерекшелігі сол, Мәдина қобызбен Абайдың әнін нақышына келтіре орындап, көрерменнің ризашылығына бөленді.
Осылайша сайыс та қорытындыланды. Бас жүлдеге Гүлдана Ескендірова лайық деп табылса, I орынды Арайлым Рысбекқызы иеленді. Ал, II орын Жұлдыз Ерболқызына, III орын Мәдина Алақбаеваға бұйырды. Ал Айгүл Хамитова «Көрермен көзайымы» жүлдесін иеленді.
Қалибек АЛТЫБАЙ,
«Семей таңы»
