Semeytany.kz — Жалған ақпаратқа қарсы іс-қимыл орталығы Қазақстан Республикасының жаңа Конституциясы жобасында шетелдіктерге жер сатуға тыйым салу алынып тасталды деген ақпараттың тарап жатқанын мәлімдеп, оның шындыққа жанаспайтынын хабарлады. Орталықтың айтуынша, бұл – фактілерді бұрмалау әрі азаматтарды жаңылыстыратын манипуляциялық ақпарат.
Ресми түсіндірмеде қолданыстағы Қазақстан Республикасы Конституциясының 6-бабы 3-тармағындағы «жер және оның қойнауы, су көздері, өсімдіктер мен жануарлар дүниесі, басқа да табиғи ресурстар» туралы тұжырым жаңа Конституция жобасында да дәл сол күйінде сақталғаны айтылған. Яғни аталған норма өзгеріске ұшырамаған.
Сондай-ақ Орталық Конституциялық реформа жөніндегі Конституциялық реформа жөніндегі комиссия бұл нормалар өзгеріссіз қалуға тиіс екенін растағанын жеткізді. Қосымша мәлімет ретінде, мемлекеттің тұтастығы мен унитарлығы туралы ережелер жаңа Конституция жобасында бастапқы тарауларда «конституциялық құрылыстың негіздері» ретінде бекітілгені атап өтіледі. Бұл аумақтық тұтастық пен базалық қағидаттардың өзгермейтіндігіне құқықтық кепілдіктерді күшейтеді.
2026 жылғы 30 қаңтардағы жаңа Конституция жобасының 2-бабында да егемендік бүкіл аумақты қамтитыны, мемлекеттің тұтастығы мен бөлінбеуі қорғалатыны және егемендік, тәуелсіздік, унитарлық, аумақтық тұтастық пен басқару үлгісі өзгермейтіні көрсетілген.
Осыған байланысты Орталық «шетелдіктерге жер сатуға тыйымның күші жойылды» деген мәлімдемелердің құқықтық негізі жоқ екенін және қоғамды адастыратынын ескертті. Сонымен бірге, фактілерді әдейі бұрмалап, манипуляциялық ақпарат тарату заңдық жауапкершілікке әкелуі мүмкін екенін хабарлап, азаматтарды да, медиа өкілдерін де мәліметті тек ресми дереккөздерден тексеруге шақырды.
