Жалпыұлттық социал-демократиялық партияның Орталық аппаратында ЖСДП Саяси кеңесінің отырысы өтіп, Қазақстан Республикасының Конституциясының жаңа жобасы жан-жақты талқыланды.
Жиын барысында кеңес мүшелері Ата заңға енгізілуі мүмкін өзгерістердің мазмұнын саралап, ұсынылған бастамалардың ел дамуына ықпалын бағалады. Сонымен бірге, саяси жүйені жаңарту, қоғам мен мемлекет арасындағы өзара түсіністік пен ынтымақты нығайту мәселелері де күн тәртібінен түспеді.
Қатысушылар Конституция жобасын талқылау қоғамның жаңаруға деген сұранысын күшейткенін атап өтті. Олардың пікірінше, қазіргі кезеңде тұрақты шешімдер мен нақты мүмкіндіктерді іздеу – азаматтар күткен басты бағыттардың бірі.
Отырыста ұсынылып отырған конституциялық өзгерістердің логикасы мемлекеттік саясаттың әлеуметтік бағытын күшейтуге, мемлекет пен қоғам арасындағы келісімді арттыруға негізделетіні айтылды. Кеңес мүшелері Конституцияда бекітілетін нормалар әлеуметтік салада, еңбек қатынастарында және азаматтардың өмір сапасын жақсартуда нақты нәтижеге жеткізуі тиіс екенін жеткізді.
Реформаның институционалдық қырларына да ерекше назар аударылды. ЖСДП өкілдері билік тармақтарының өзара іс-қимылын тұрақтандыратын модельдің маңызына тоқталып, өкілетті органдардың рөлін күшейту және мемлекеттік институттар қабылдайтын шешімдер үшін жауапкершілікті арттыру қажеттігін талқылады.
Сондай-ақ, жаңа Конституция жобасын әзірлеудің форматы – мазмұнды қоғамдық-сараптамалық диалогқа мүмкіндік беретін маңызды тетік екені де айтылды. Саяси кеңестің пайымынша, мұндай тәсіл әртүрлі көзқарас пен өңірлік тәжірибені ескеріп, ұзақ мерзімді әрі байыпты шешім қабылдауға жол ашады.
Отырыс қорытындысында ЖСДП Саяси кеңесі конституциялық реформаның негізгі бағыттары бойынша ортақ ұстаным қалыптастырғанын мәлімдеп, алдағы талқылауларда ұсыныстарды сараптамалық тұрғыда пысықтауға белсенді қатысуға дайын екенін білдірді.
Жиын іскерлік әрі конструктивті жағдайда өтті. Партия өкілдері бұл басқосу ЖСДП-ның жауапкершілігі жоғары, әлеуметтік бағыттағы және құқықтық мемлекетті дамытуға ниетті саяси күш екенін тағы бір мәрте айқындағанын атап өтті.
