Семей қаласында әр салмақ дәрежесі бойынша қазақ күресінен ерлер мен әйелдер арасындағы Шығыс Қазақстан облысының чемпионаты болып өтті. Аймағымыздың әр түкпірінен келген балуандар өзара мықтыларды анықтады.
{jcomments on}Бұл жолғы жарысқа қазақ күресі бойынша Шығыс өңірінде есімдері енді танымал бола бастаған спортшылар жиналған екен. Байрақты бәсекеде бағы жанғандар арасында әсіресе Абай мен Аягөз, Үржар сынды аудандардың өкілдері көп болды.
— Бұл сайыс алдағы маусым айында өтетін Қазақстан біріншілігіне іріктеу болып табылады. Қазіргі көрсеткіштеріне қарасақ, балуандарымыз бабында. Жаттығулары жаман өтпегенге ұқсайды. Қазақ күресінің әдіс-тәсілін шебер қолданып, ширақ қимылдауда. Бұл біріншіліктен жүлделі орын алған балуандар республика біріншілігінде облысымыздың намысын қорғайтын болады, — дейді пікір білдірген облыстық қазақ күресі федерациясының вице-президенті Амантай Қазымұлы.
55 пен 100 келілік салмақ дәрежесіндегі бәсекеге сайланып келгендер арасында есімдері республикаға танымал бола бастаған балуандар ақсуаттық Ерсін Шынғазиев, аягөздік Қанат Бөлекбаев, абайлық Қуаныш Искаковтар мен семейлік Дидар Тұқышев, Ерлан Қанағатовтар сынды өрендер болды.
— Бұл сайыста ерлер 7 салмақта белдессе, әйелдер 6 салмақ дәрежесі бойынша бақ сынасуда. Өткен жылғы республикалық бәсекеде өңір құрамасы командалық есепте топ жарған еді. Соған байланысты ағымдағы додада Шығыс Қазақстан әр салмақта 3 палуаннан өнер көрсету мүмкіндігіне ие. Ал турнирге келер болсақ, жоғары деңгейде өтуде. Ертеңінен үміт күттіретін спортшыларымыз көп, — деп атап өтті қазақ күресінен ШҚО-ның аға бапкері, сайыстың бас төрешісі Шыңғыс Тұрсынов.
Тартысты өткен жарыс қорытындысы бойынша, 55 келіде Тарбағатай ауданының балуаны Қуат Бекпаев жеңімпаз атанса, 60 келіде абайлық Қуаныш Искаков топ жарды. Ал 66 келілік салмақта Аслан Түсіпханов, 74 келіде Қуаныш Мұратов, 82 келі салмақ дәрежесінде Ерасыл Қайырбек, 90 келіде Ерлан Канкиев пен 100 келіде Ержан Алдажар сынды семейлік қазақ күресі шеберлерінің жолы болды. Ал 100-ден жоғары аса ауыр салмақта өскемендік Талғат Амренов ақтық сында жеңімпаз атанды.
Ендігі аралықта топ жарған спортшылардан өңір құрамасы іріктеліп, 5 — 9 маусым күндері қазақ күресінің майталманы, мемлекеттік дәрежедегі жаттықтырушы Марат Жақиттың 70 жылдық мерейтойына арналған Аягөз қаласында жалауын көтеретін республика чемпионатында облыс намысын қорғамақ.
Қуаныш ЖОЛЫМБЕТ,
«Семей таңы»
