Кеше Семей қалалық мәслихатының кезектен тыс отыз тоғызыншы сессиясы өтті. Сессия жұмысына қала әкімі Айбек Кәрімов, Семей қалалық мәслихатының хатшысы Бейсенбек Ақжалов, дербес бөлімдердің, әртүрлі мемлекеттік мекемелердің басшылары, қоғамдық ұйымдар өкілдері қатысты. Сессияның күн тәртібінде төрт мәселе талқыланды.
{jcomments on}Бірінші кезекте Семей қаласының 2015-2017 жылдарға арналған бюджеті туралы өткен жылдың 23 желтоқсанында қабылданған шешімге өзгерістер мен толықтырулар енгізу мәселесі талқыланды. Аталмыш сұрақ бойынша экономика және бюджетті жоспарлау бөлімінің басшысы Гүлжан Алтынбекова баяндама жасады. Гүлжан Қайырханқызы қала қазынасының көлемінің өзгеруі жайлы айта келе, трансферттер мен кредиттер сомасына тоқталды.
— Республикалық бюджет есебінен қала бюджетіне аударылатын трансферттер отыз бес миллион қырық мың теңгеге артты. Бұл қаражат мемлекеттік басқару деңгейлері арасындағы өкілеттіліктерді шектеуге, Суық бұлақ кентіндегі тұрғын үй құрылысын электр қуатымен қамтамасыз етуге, Жеңістің жетпіс жылдығына арналған іс-шараларды өткізуге жұмсалады. Қазақстан Республикасы Ұлттық қоры есебінен мақсатты трансферттер көлемі жүз он бір миллион жиырма бес мың теңгеге көбейді, — деді экономика және бюджетті жоспарлау бөлімінің басшысы. Сондай-ақ ол Қазақстан Республикасы Ұлттық қоры есебінен берілетін кредиттер сомасы бір миллиард сегіз жүз жетпіс төрт миллион алты жүз отыз тоғыз мың теңгеге артқанын айтты. Аталған қаражаттың бір миллиард сегіз жүз жиырма төрт миллион алты жүз отыз тоғыз мың теңгесін сумен қамтамасыз ету және су қайтарғыш жүйелерін салу және қайта құруға, елу миллион теңгесін Байсалықов көшесіндегі көпқабатты тұрғын үй құрылысына бөлу жоспарланып отырған көрінеді.
Баяндамасында экономика және бюджеттік жоспарлау бөлімінің басшысы «Жалпы сипаттағы мемлекеттік қызметкер» функционалдық тобы бойынша қала қазынасының шығындар көлемін отыз бір миллион тоғыз жүз он бес мың теңгеге қысқарту көзделгенін жеткізді. Соның ішінде жекелеген бағдарламалар бойынша қаржылық өзгерістерге нақтырақ тоқталды. Қала бюджетіне өзгерістер мен толықтырулар енгізуге қатысты мәліметтерді тыңдағаннан кейін депутаттар ұсынылған шешім жобасын бірауыздан қолдап дауыс берді.
Сондай-ақ сессияда қалалық мәслихат хатшысы Бейсенбек Ақжалов Семей қаласы мәслихатының 2009 жылғы 24 маусымдағы «Салықтың базалық ставкаларын түзету туралы» шешімінің күші жойылды деп тану мәселесі бойынша баяндама жасады. Ақпаратты тыңдағаннан кейін халық қалаулылары ұсынылған шешім жобасын мақұлдады. Содан кейін үшінші кезектегі сайлау комиссияларының жекелеген мүшелерін міндеттерінен босату және төртінші сайлау комиссияларының шығып кеткен мүшелерінің орындарына мүшелер сайлау туралы мәселелер қарастырылды. Бұл сұрақтар бойынша да қалалық мәслихат хатшысы мәлімет беріп өтті. Ақпаратқа қаныққан соң халық қалаулыларының барлығы осы екі мәселе бойынша да ұсынылған шешімдер жобаларын бірауыздан қолдап дауыс берді.
Мирас ҚҰСАЙЫН,
«Семей таңы»
