Абайдың мемлекеттік тарихи — мәдени және әдеби — мемориалдық қорық — мұражайында «Алаштың Әлиханы» атты танымдық кеш өтті. Кешке қаламыздың зиялы қауымы, мұражай қызметкерлері, әдебиет сүйер қауым қатысты.
{jcomments on}Кештің негізгі мақсаты көрнекті қоғам және мемлекет қайраткері, ұлт — азаттық қозғалысының негізін салушы және Алаш қозғалысының жетекшісі, Алашорда автономиясы үкіметінің төрағасы, жалынды публицист, ғұлама ғалым, әрі шебер аудармашы Әлихан Бөкейхановтың өмірі мен қоғамдағы рөлін, қызметін жан-жақты терең зерттеу, тану, таныту, келешек жас ұрпаққа насихаттау болып табылады.
Өткен XX ғасырда ұлтымыз талай қилы кезеңдерден, тарихи сындардан өтті. Ұлт үшін ұмытылмастай із қалдырған азаматтар, ғалымдар, қарапайым азаматтар жазықсыз жапа шекті. Солардың бірі көрнекті қоғам және мемлекет қайраткері Әлихан Бөкейханов болды.
Әлихан Бөкейханов қазақ тарихындағы тұңғыш саяси ұйым Алаш партиясын ұйымдастыруға кіріскен бірден-бір тұлға болып табылады. Бүкіл саналы ғұмырын қазақ халқының ұлттық-саяси бостандығы мен дербестігі үшін күреске арнаған ұлы тұлға ретінде қазақ тарихында алар орны ерекше.
Танымдық кеште «Әлихан Бөкейхановтың қоғамдық қызметі» тақырыбында Қазақ инновациялық гуманитарлық — заң университетінің оқытушысы Ф. Қайырханова, «Әлихан Бөкейхановтың абайтануға қосқан үлесі» тақырыбында Абай мұражайы директорының ғылыми жұмыстар жөніндегі орынбасары М. Қайрамбаева баяндама оқыды.
Сондай-ақ кеш барысында қаламыздағы өнер ошақтарының әншілері Г. Еруова, Б. Тойымбаева, М. Сыдықов, күйші Р. Азаматова өз өнерлерін көрсетті.
Абай қорық — мұражайы.
