Биыл Тәжік — Ауған шекарасында әскери борыштарын өтеу барысында қазақстандық жауынгерлердің ерлікпен қаза тапқанына жиырма жыл толады. Тапсырылған міндетті орындау кезінде мерт болған батырлардың рухына тағзым ету – қасиетті парыз. Осы ретте қаламыздағы Ұлттық гвардияның 5511 әскери бөлімшесінің ұйымдастыруымен, қыршынынан қиыл—ған боздақтарды еске алуға арналған шағын футболдан турнир өтті.
{jcomments on}Аталмыш спорттық шараны өткізудегі басты мақсат – еліміздің Қарулы Күштері қатарында қызмет етіп жүрген жас сарбаздарға әскери міндетін, азаматтық борышын өтеу кезінде қаза тапқан жауынгерлердің ерлігін үлгі етіп, патриоттық рухта тәрбиелеу, спорт пен салауатты өмір салтын насихаттау.
1995 жылдың 7 сәуірі — Ішкі әскер тарихындағы ең қайғылы даталардың бірі. Памир тауында 1995 жылдың 7 сәуірінде еліміздің ішкі әскер сарбаздары жаудың шабуылына тап болып, қарсыластар күшінің теңсіздігіне қарамастан, кескілескен ұрыста үлкен ерлік пен батылдық танытты. Алайда бұл ұрыста 17 қазақ жауынгері қаза тауып, отыздан астамы жараланған болатын.
— Олар Отанының мүддесін қорғап, өздерінің борыштарын соңына дейін өтеп, ерліктің ерен үлгісін көрсетті. Қазіргі таңда біздің арамызда Тәжік — Ауған шекарасын күзетуге қатысқан жауынгерлер қызмет етуде. Әскери борышын адал орындай отырып, олар еліміздегі тыныштық пен тұрақтылықтың нығаюына үлес қосып, Отан алдындағы парыздарын абыроймен атқарып келеді, -дейді Қазақстан Республикасы Ұлттық гвардиясының 5511 әскери бөлімі командирінің тәрбие және әлеуметтік — құқықтық жұмыстары жөніндегі орынбасары Ерлік Ықыласов. Сондай-ақ ол аталмыш турнирдің осымен екінші жыл қатарынан өткізіліп келе жатқанын атап өтті.
Жарыстың ашылу салтанатында бір минут үнсіздік жарияланып, қатысушылар қыршыннан қиылған жауынгерлердің рухына тағзым етті. Одан кейін ұйымдастырушылар командаларға турнирдің шарттары мен ережелері туралы ақпарат берді. Күштік құрылымдардың қызметкерлері арасында болған дода олимпиадалық жүйе бойынша өткізілді. Жиыны жарысқа тоғыз команда қатысты.
Мирас ҚҰСАЙЫН,
«Семей таңы»
