Бүгінде еліміз бойынша Қазақстанда жасалған өнімді қолдауға ерекше басымдық берілуде. Осы орайда жуырда кәсіпкерлер палатасы филиалы мен жергілікті БАҚ өкілдері Семейдегі ғана емес, Шығыстағы іргелі кәсіпорын «Восток Бройлер» ЖШС—де болып, қазіргі тыныс—тіршілігіне қанықты.
{jcomments on}Кәсіпорынға келген қонақтарды мұндағы атқарылып жатқан жұмыс барысымен таныстырған серіктестік директоры Дәурен Айсариев өндірістегі жаңа инновациялық технологиялар игілігі жайында жан-жақты түсінік беріп өтті. Оның сөзіне сүйенсек, қазір мұнда 360 адам еңбек етуде. Ал сою алаңында 90 адам жұмыспен қамтылған. Барлығы да семейлік тұрғындар. Даярланған өнімдер, негізінен, ішкі нарыққа шығарылады екен. Мәселен, Астана, Алматы, Өскемен қалаларына қоса, жуырда ел батысындағы облыстарға да өнімнің жаңа партиясы жол тартыпты. Алайда Ресейге тауар экспорттау мәселесі қазір баяулаған. Себебі рубль бағамының құлдырауы тиімсіздік әкелген. Дегенмен көрші елдің Томск, Новосібір, Барнауыл сынды қалалары, негізінен, қазақстандық өнімге деген сұранысты арттыра түскен. Оның себебі бізде табиғи таза өнімдер ғана өндіріледі. Бір дәлел ретінде жуырда ғана халықаралық «Халал» стандартына көшіп, арнайы сертификат иеленгенін айтуға болады.
— Қазіргі күні бізде 370 мың бас ет бағытындағы құс өсірілуде. Жұмыс орны толығымен автоматтандырылған. Құстарға тек табиғи таза жем ғана беріледі. Арнайы микроклиматтың сақталуы мен түрлі химиялық қоспалар қосылмауы себепті тауық етінің өзіндік ерекше дәмі бар. Бұл жағынан көрші елдерден келетін сапасыз өнімдерден сапасы анағұрлым жоғары тауар өндіретінімізді сеніммен айта аламын, — дейді «Восток Бройлер» ЖШС директоры Дәурен Ыдырысұлы.
Қазіргі әлемді кезіп жүрген экономикалық дағдарыс жағдайына қарамастан, кәсіпорын өз жұмыс орнын кеңейтуді көздеуде. Атап айтсақ, сағатына 4000 бас құс соя алатын қуатты цех салуды жоспарлауда. Жалпы, бүгінгі күні мемлекет қолдауына сүйеніп отырған жай бар. Себебі өндірілген өнімге арнайы субсидия бөлінеді екен. Әйтсе де ең маңыздысы тұтынушының қолдауы екені сөзсіз.
— Бұл ретте ел тұрғындары іргелес мемлекеттерден әкелінетін өнімдердің сапасы төмендігін, тіпті салмонеллез сынды қауіпті ауру қоздырғыштары бар екендігін жақсы біліп қалды. Мәселен, құс еті мен терісінің арасына шприцпен су жіберіп, алаяқтық жасайтындар ісі қазіргі күні министрлік деңгейінде қозғалуда. Сондықтан да жергілікті, қазақстандық өнімдерді ғана тұтынған дұрыс, — дейді мұндағы қызметкерлер.
Сондай-ақ кәсіпкерлер палатасы филиалының директоры Ардақ Әділжанов кәсіпорындағы сою цехын аралап шығып, ондағы еңбек етіп жатқан жұмысшылармен жүздесті. Мұнда құс еті салынған қаптама сыртына «Әр дауыс маңызды!» деген жапсырмалар жапсырылуда.
Қуаныш ЖОЛЫМБЕТ,
«Семей таңы»
